Business Idea:- सध्या नोकऱ्याची उपलब्धता खूप कमी असल्यामुळे सुशिक्षित बेरोजगारांची संख्या दिवसेंदिवस वाढताना आपल्याला दिसून येत आहे. बेरोजगारी हा भारतीय अर्थव्यवस्थेपुढील एक ज्वलंत प्रश्न असून दिवसेंदिवस बेरोजगारीत वाढ होताना दिसून येत आहे.
त्यामुळे या बेरोजगारीच्या प्रश्नावर मात करण्यासाठी सरकारच्या माध्यमातून देखील अनेक प्रकारचे प्रयत्न करण्यात येतात. या प्रयत्नांचा भाग म्हणून सरकारच्या माध्यमातून अनेक योजनांची अंमलबजावणी करण्यात येत असूनही व्यवसाय उभारणीला या योजनेच्या माध्यमातून अनुदान स्वरूपात किंवा कर्ज स्वरूपात लाभार्थ्यांना मदत करण्यात येते.
जेणेकरून बेरोजगार तरुण-तरुणींना स्वतःचा व्यवसाय उभा करता यावा व त्यांना स्वतःचा स्वयंरोजगार निर्माण व्हावा व त्यांचा आर्थिक स्तर उंचवावा हा त्यामागे सरकारचा उद्देश आहे. अगदी याच पद्धतीने जर आपण केंद्र सरकारच्या मदतीने सुरू करता येणाऱ्या एका व्यवसायाची माहिती या लेखात घेणार आहोत व हा व्यवसाय वैद्यकीय क्षेत्राशी निगडित आहे.
सरकारची मदत घ्या आणि जन औषधि केंद्र सुरू करा
केंद्र सरकारच्या माध्यमातून जेनेरिक औषधे पुरवता यावी त्याकरिता प्रधानमंत्री भारतीय जन औषधि केंद्र उघडण्याची संधी सरकारकडून दिली जात असून अशा प्रकारच्या जन औषधी केंद्रांची संख्या वाढवण्यावर
केंद्र सरकार भर देत आहे. सर्वसामान्य नागरिकांवरील औषधांचा भारताचा जो काही भार असतो तो कमी करता यावा याकरिता केंद्र सरकारच्या माध्यमातून जन औषधी केंद्र उघडण्यात येत आहेत.
कोणाला सुरू करता येते जन औषधी केंद्र?
जन औषधी केंद्र उघडण्याकरिता सरकारच्या माध्यमातून तीन प्रकारच्या श्रेणी तयार करण्यात आलेले आहेत. यातील जर आपण पहिल्या श्रेणीचा विचार केला तर यामध्ये कोणतीही व्यक्ती, बेरोजगार असलेला फार्मसिस्ट, कोणताही डॉक्टर किंवा नोंदणीकृत वैद्यकीय व्यवसायी या प्रकारचे जन औषधी केंद्र उघडू शकतात.
यामध्ये दुसरी श्रेणी पाहिली तर या श्रेणीत ट्रस्ट, एनजीओ तसेच खाजगी दवाखाने इत्यादींचा समावेश होतो. त्यासोबतच तिसऱ्या श्रेणीमध्ये राज्य सरकारांनी नॉमिनेटेड केलेल्या एजन्सींना संधी दिली जाते. म्हणजेच यावरून आपल्याला दिसून येते की जर जन औषधी केंद्र उघडायचे असेल तर डी फार्मा किंवा बी फार्म पदवी असणे गरजेचे आहे.
जेव्हा जनऔषधी केंद्रासाठी अर्ज करतात तेव्हा पुरावा म्हणून ही पदवी सादर करणे आवश्यक असते. विशेष म्हणजे या योजनेच्या माध्यमातून जन औषधी केंद्र सुरू करण्यासाठी समाजातील एससी, एसटी आणि अपंग अर्जदारांना 50 हजार रुपयांपर्यंत आगाऊ रक्कम मदत म्हणून दिली जाते.
जन औषधी केंद्रासाठी कसा कराल अर्ज?
तुम्हाला देखील जन औषधी केंद्र उघडायचे असेल तर सगळ्यात अगोदर तुम्हाला जन औषधी केंद्राच्या नावाने किरकोळ औषध विक्रीचा परवाना घेणे गरजेचे असते
याकरिता तुम्हाला https://janaushadhi.gov.in/ या अधिकृत वेबसाईटवर जाऊन फॉर्म डाऊनलोड करू शकतात. फॉर्म डाऊनलोड केल्यानंतर तुम्हाला ब्युरो ऑफ फार्मा पब्लिक सेक्टर अंडरटेकिंग ऑफ इंडियाच्या जनरल मॅनेजरच्या नावाने अर्ज पाठवावा लागतो.
जन औषधी केंद्राच्या माध्यमातून किती मिळते आर्थिक उत्पन्न?
जन औषधी केंद्रांच्या माध्यमातून ज्या औषधांची विक्री केली जाते त्या औषधांच्या विक्रीवर 20 टक्के कमिशन दिले जाते. तसेच या कमिशनशिवाय प्रत्येक महिन्याला केलेल्या विक्रीवर 15 टक्क्यांपर्यंत प्रोत्साहन म्हणून काही रक्कम मिळत असते व हे तुमचे आर्थिक उत्पन्न असते.
तसेच या योजनेच्या माध्यमातून केंद्र सरकार दुकान उघडण्याकरिता आवश्यक फर्निचर व इतर आवश्यक वस्तूंकरिता दीड लाख रुपयांपर्यंतची मदत देत असते. तसेच बिलिंग करिता आवश्यक कम्प्युटर आणि प्रिंटर खरेदी करण्यासाठी पन्नास हजार रुपयांची मदत देखील दिली जाते.
