मुंबई-नागपूर समृद्धी महामार्गावर शनिवारी (दि. ३१) सकाळी तीन भीषण अपघात घडले, ज्यामध्ये चारजणांचा मृत्यू झाला, तर सातजण गंभीर जखमी झाले. या अपघातांमध्ये रत्नागिरीतील तीनजणांचा जागीच मृत्यू झाला, तर अहिल्यानगर जिल्ह्यातील एका महिलेलाही आपला जीव गमवावा लागला. तिसऱ्या अपघातात मात्र कोणतीही जीवितहानी झाली नाही. या घटनांमुळे महामार्गावरील सुरक्षिततेच्या उपाययोजनांबाबत पुन्हा एकदा प्रश्नचिन्ह निर्माण झाले आहे.
पहिला अपघात
पहाटेच्या सुमारास रत्नागिरीतील सात जण कारने प्रयागराजच्या कुंभमेळ्याहून घरी परतत असताना हा अपघात घडला. वावी पोलिस ठाण्याच्या हद्दीतील मलढोण शिवारात सकाळी सहाच्या सुमारास चालकाचे नियंत्रण सुटल्याने कार समोरच्या वाहनावर आदळली. या अपघातात रत्नागिरी येथील डीएड महाविद्यालयाचे माजी प्राचार्य प्रताप सावंत देसाई (६९), अथर्व किरण निकम (२४) आणि चालक भाग्यवान झगडे (५०) यांचा जागीच मृत्यू झाला.
याशिवाय निवृत्त सहाय्यक निबंधक किरण निकम (५८), रमाकांत पांचाळ (६०), रत्नागिरीतील मंदिराचे विश्वस्त संतोष रेडीज (५०) आणि प्रांजल प्रकाश साळवी (२४) हे गंभीर जखमी झाले असून, त्यापैकी किरण निकम यांची प्रकृती गंभीर असल्याचे सांगण्यात आले.
दुसरा अपघात
दुसरा अपघात सोनांबे-सोनारीदरम्यान घडला. सोनगाव (ता. राहुरी, जि. अहिल्यानगर) येथील अमोल भाऊसाहेब भाटे (३०) हे त्यांच्या कुटुंबासह वसई येथे एका कौटुंबिक कार्यक्रमासाठी गेले होते. घरी परतताना समृद्धी महामार्गावर चॅनल नंबर ५७०.७ येथे त्यांची कार समोरच्या ट्रकवर जोरात आदळली. या अपघातात मंदा भाऊसाहेब भाटे (४९) यांचा जागीच मृत्यू झाला, तर अमोल भाटे, त्यांची पत्नी आणि पाच वर्षांची मुलगी सोनल गंभीर जखमी झाले आहेत. जखमींना तातडीने रुग्णालयात हलवण्यात आले आहे.
तिसरा अपघात
तिसरा अपघात शनिवारी पहाटे ५.३० वाजता घडला. मुंबईहून पैठणकडे जाणाऱ्या एका टेम्पोचा पुढील टायर फुटल्याने वाहन लोखंडी बॅरियरवर आदळले. सुदैवाने या अपघातात कुणालाही दुखापत झाली नाही. मात्र, हा अपघात महामार्गावर वाहनचालकांच्या सुरक्षेच्या प्रश्नांकडे लक्ष वेधतो.
सुरक्षेचा प्रश्न पुन्हा ऐरणीवर
या भीषण अपघातांमुळे समृद्धी महामार्गावर प्रवास करणाऱ्या नागरिकांच्या सुरक्षिततेबाबत प्रश्न निर्माण झाला आहे. महामार्गावर गतीमर्यादा पाळण्याच्या नियमांकडे दुर्लक्ष होत असल्याचे दिसून येते. तसेच, प्रवासी वाहनांमध्ये होणारे अपघात ही चिंतेची बाब ठरत आहे. महामार्गावरील वाहनचालकांनी सुरक्षित वेग राखणे आणि रस्त्याच्या नियमांचे पालन करणे अत्यंत महत्त्वाचे आहे.
