नगरमध्ये शनिवारी झालेल्या नियोजन समितीच्या बैठकीत संगमनेर तालुक्यातील विविध समस्यांवर तसेच महावितरणच्या कामकाजावर तीव्र नाराजी व्यक्त करण्यात आली. पालकमंत्री राधाकृष्ण विखे पाटील यांच्या उपस्थितीत पार पडलेल्या या बैठकीत जिल्ह्यातील अनेक महत्वपूर्ण विषयांवर चर्चा झाली. नाशिक शिक्षक मतदारसंघाचे आमदार सत्यजित तांबे, आमदार अमोल खताळ, आमदार काशिनाथ दाते, आमदार विठ्ठलराव लंघे, आमदार हेमंत ओगले आणि अन्य मान्यवर आमदारांनी वेगवेगळ्या समस्यांकडे लक्ष वेधले.
शासकीय कार्यालयातील स्वच्छतागृहांची दुरवस्था
बैठकीची सुरुवातच शासकीय कार्यालयांमधील स्वच्छतागृहांच्या दुरवस्थेच्या मुद्द्यावरून झाली. आमदार सत्यजित तांबे यांनी जिल्हाधिकारी कार्यालयासह तालुका पातळीवरील शासकीय कार्यालयातील अस्वच्छता आणि हलाखीच्या परिस्थितीबाबत प्रश्न उपस्थित केला. त्यांनी विशेषतः जिल्हाधिकारी कार्यालयातीलच स्वच्छतागृहाची दुरवस्था अधोरेखित करत यावर तातडीने उपाययोजना करण्याची गरज व्यक्त केली.
बिबट्यांच्या वाढत्या संख्येवर नियंत्रण आणण्याची मागणी
आमदार तांबे आणि खताळ यांनी मानवी वस्तीत बिबट्यांचा वाढता शिरकाव हा मोठा प्रश्न ठरत असल्याचे सांगत, बिबट्यांची नसबंदी करण्याची मागणी केली. गेल्या काही महिन्यांत ग्रामीण भागात बिबट्यांच्या हल्ल्यांमध्ये वाढ झाली आहे. त्यामुळे नागरिकांमध्ये भीतीचे वातावरण निर्माण झाले असून, त्यावर प्रभावी उपाययोजना करण्याची गरज आहे.
संगमनेर तालुक्यात जलसंधारणाच्या कामांना विलंब
आमदार तांबे आणि खताळ यांनी संगमनेर तालुक्यात जलसंधारणाच्या मंजूर प्रकल्पांना अद्याप सुरुवात न झाल्याबद्दल नाराजी व्यक्त केली. या योजनांसाठी मंजुरी मिळाली असतानाही प्रत्यक्षात कामे सुरू न होणे हे प्रशासनाच्या ढिसाळ कारभाराचे द्योतक असल्याचे त्यांनी निदर्शनास आणून दिले.
शेतकऱ्यांसाठी वीज जोडणीची समस्या
महावितरणच्या कार्यपद्धतीवर नाराजी व्यक्त करत आमदार काशिनाथ दाते यांनी शेतकऱ्यांना शेतीसाठी नवीन वीज जोडणी मिळण्यात येणाऱ्या अडचणी उपस्थित केल्या. ग्रामीण भागात विजेच्या रोहित्रांवरील लोड वाढत असून, गेल्या महिनाभरापासून शेतकऱ्यांना पुरेशा दबाने वीज मिळत नाही. नवीन वीज जोडणीसाठी अर्ज केल्यास, त्यांना सोलर पंपाचा पर्याय सुचवला जात आहे, मात्र सोलर पंप बसविणे प्रत्येक शेतकऱ्यासाठी शक्य नसल्याने महावितरणने अधिक लवचिक धोरण स्वीकारण्याची गरज आहे, असे त्यांनी सांगितले.
संगमनेर तालुक्यातील ‘डार्क झोन’
संगमनेर तालुक्यातील वीज समस्या सोडवण्यासाठी सर्व बाबींची पूर्तता करूनही महावितरणकडून ‘डार्क झोन’ची अट पुढे केली जात असल्याने अनेक शेतकरी अडचणीत आले आहेत. महावितरणच्या धरसोड वृत्तीमुळे शेतकऱ्यांचे मोठे नुकसान होत असल्याचे आ. दाते यांच्यासह इतर आमदारांनी पालकमंत्री विखे पाटील यांच्या निदर्शनास आणून दिले.
अन्य महत्वपूर्ण मुद्दे
याशिवाय कालव्याच्या दुरुस्ती, वीज खंडित होण्याच्या समस्या, रेल्वे हद्दीतील अतिक्रमण, सोलर वीज पंप योजना, नगरपालिका क्षेत्रात छत्रपती शिवाजी महाराजांचा पुतळा उभारण्याची मागणी, तसेच अंमली पदार्थांच्या विक्रीवर प्रतिबंध घालण्याच्या उपाययोजनांवर देखील बैठकीत चर्चा करण्यात आली.
सर्वसामान्यांच्या समस्यांना प्राधान्य
ही बैठक राज्यातील विद्यमान सरकारच्या कार्यकाळातील पहिली नियोजन समिती बैठक होती. त्यामुळे सर्वसामान्यांच्या समस्यांवर तातडीने तोडगा काढण्यासाठी आमदारांनी आक्रमक भूमिका घेतली. बैठकीत मांडलेले विषय प्रामुख्याने शेतकऱ्यांच्या वीजपुरवठ्याच्या समस्या, महावितरणची कार्यशैली, संगमनेर तालुक्यातील जलसंधारण प्रकल्प आणि बिबट्यांच्या वाढत्या हल्ल्यांवर नियंत्रण या महत्त्वाच्या विषयांवर केंद्रित होते. पालकमंत्री राधाकृष्ण विखे पाटील यांनी या सर्व मुद्द्यांची गांभीर्याने दखल घेऊन लवकरच सकारात्मक निर्णय घेतले जातील, असे आश्वासन दिले.
शेतकऱ्यांच्या हितासाठी तातडीच्या उपाययोजना आवश्यक
नियोजन समितीच्या बैठकीत शेतकऱ्यांच्या समस्या प्रामुख्याने चर्चेत आल्या. वीजपुरवठ्याचा अभाव, विजेच्या जोडण्यांबाबत उदासीनता आणि जलसंधारणाच्या प्रलंबित कामांमुळे शेतकरी त्रस्त आहे. अशा परिस्थितीत सरकारने तातडीने या समस्या सोडवण्यासाठी ठोस निर्णय घेण्याची गरज असल्याचे सर्व आमदारांनी बैठकीत ठासून सांगितले.
