Ahilyanagar News: कर्जत- तालुक्यातील रेहकुरी अभयारण्य हे काळविटांच्या संरक्षणासाठी प्रसिद्ध आहे. येथील जैवविविधता आणि नैसर्गिक सौंदर्य यामुळे हे अभयारण्य पर्यटक आणि वन्यजीवप्रेमींसाठी आकर्षणाचं केंद्र आहे. मात्र, अलीकडेच येथे लावण्यात आलेल्या एका फलकाने सर्वांचं लक्ष वेधलं आहे. या फलकावर “शिकारबंदी करण्यास सक्त मनाई” असा मजकूर आहे, ज्यामुळे शिकारीला परवानगी असल्याचा चुकीचा संदेश गेला आहे. गुरे चराई, वृक्षतोड, प्लास्टिक वापर, मद्यपान आणि धुम्रपान यांना बंदी असताना शिकारीला प्रोत्साहन देणारा हा फलक वन विभागाच्या निष्काळजीपणाचा पुरावा आहे.
फलकाचा गोंधळ आणि प्रश्नचिन्ह
रेहकुरी अभयारण्यात वन्यजीव विभागाच्या पुणे कार्यालयाने विविध ठिकाणी सूचना फलक लावले आहेत. यामध्ये गुरे चराई, वृक्षतोड, अभयारण्यात अनधिकृत प्रवेश, प्लास्टिक वापर, मद्यपान आणि धुम्रपान यांना बंदी घालण्याचे स्पष्ट निर्देश आहेत. मात्र, याच फलकांपैकी एका फलकावर “शिकारबंदी करण्यास सक्त मनाई” असा विचित्र मजकूर लिहिण्यात आला आहे. याचा अर्थ असा होतो की, शिकारबंदी करणं बेकायदेशीर आहे, म्हणजेच शिकारीला परवानगी आहे! हा फलक पाहून स्थानिक नागरिक आणि पर्यटकांमध्ये गोंधळ निर्माण झाला आहे. ज्या अभयारण्याची स्थापना काळविटांसह वन्यजीवांचं संरक्षण करण्यासाठी झाली, तिथे शिकारीला प्रोत्साहन देणारा फलक कसा काय लागू शकतो, असा प्रश्न सर्वांना पडला आहे.
रेहकुरी अभयारण्याचं महत्त्व
रेहकुरी अभयारण्याची स्थापना २९ फेब्रुवारी १९८० रोजी काळविटांच्या संरक्षणासाठी झाली. २.१७ चौरस किलोमीटर क्षेत्रात पसरलेलं हे अभयारण्य काळविटांसह अनेक दुर्मीळ प्राणी आणि पक्ष्यांचं आश्रयस्थान आहे. अलीकडेच वन विभागाने या अभयारण्याची फेररचना करून त्याचं क्षेत्र वाढवलं आहे. येथील नैसर्गिक वातावरण प्राणी आणि पक्ष्यांसाठी अत्यंत अनुकूल आहे, ज्यामुळे येथे जैवविविधता समृद्ध आहे. रेहकुरी अभयारण्याने कर्जतचं नाव देशभरात पोहोचवलं आहे. येथे पर्यटक आणि प्राण्यांच्या सुरक्षेसाठी विशेष काळजी घेतली जाते. मात्र, अशा महत्त्वाच्या ठिकाणी चुकीचा फलक लागणं हे वन विभागाच्या निष्काळजीपणाचं लक्षण आहे.
चुकीच्या फलकामागचं कारण
या फलकावर खरं तर “रेहकुरी अभयारण्य क्षेत्रात शिकार करण्यास सक्त मनाई” असा मजकूर असायला हवा होता. मात्र, लेखनातील चूक किंवा निष्काळजीपणामुळे “शिकारबंदी करण्यास सक्त मनाई” असा गोंधळात टाकणारा मजकूर छापला गेला. ही चूक मजकूर लिहिणाऱ्याची आहे, फलक तयार करणाऱ्याची आहे, की अधिकाऱ्यांनी याकडे लक्षच दिलं नाही, हे स्पष्ट होत नाही. विशेष म्हणजे, हा फलक लावण्यापूर्वी कोणत्याही अधिकाऱ्याने त्याची पडताळणी केली नाही, हे आश्चर्यकारक आहे.
स्थानिकांची प्रतिक्रिया आणि कारवाईची मागणी
या फलकाची माहिती मिळताच कर्जत नगरपंचायतीचे नगरसेवक प्रसाद ढोकरीकर यांनी तीव्र नाराजी व्यक्त केली आहे. त्यांनी या प्रकरणाची सखोल चौकशी करून दोषींवर कायदेशीर कारवाई करण्याची मागणी केली आहे. ढोकरीकर यांनी रेहकुरी अभयारण्याच्या संबंधित अधिकाऱ्यांशी संपर्क साधण्याचा प्रयत्न केला, पण त्यांचा फोन लागला नाही.
