Credit Card News : आजच्या काळात क्रेडिट कार्डचा वापर मोठ्या प्रमाणात वाढला आहे. दैनंदिन खर्च, ऑनलाइन खरेदी, वैद्यकीय आपत्कालीन गरजा किंवा प्रवासासाठी अनेकजण क्रेडिट कार्डवर अवलंबून असतात. मात्र, अचानक क्रेडिट कार्डधारकाचा मृत्यू झाल्यास त्यावरील थकबाकी माफ होते, असा गैरसमज अनेकांचा असतो. प्रत्यक्षात, कार्डधारकाच्या मृत्यूनंतरही क्रेडिट कार्डची थकबाकी आपोआप माफ होत नाही. अशा परिस्थितीत बँक संबंधित रक्कम वसूल करण्यासाठी कुटुंबीयांशी संपर्क साधू शकते.
ही कटकट टाळण्यासाठी आता काही बँका क्रेडिट कार्डसोबत विशेष विमा संरक्षण (Credit Card Insurance) देत आहेत. या विम्याचा सर्वात मोठा फायदा म्हणजे, जर कार्डधारकाचा अचानक मृत्यू झाला तर क्रेडिट कार्डवरील संपूर्ण थकबाकीची रक्कम विमा कंपनी थेट बँकेत जमा करते. त्यामुळे कार्डवरील बाकी रक्कम शून्य होते आणि कुटुंबावर कोणताही आर्थिक बोजा राहत नाही.
क्रेडिट कार्ड इन्शुरन्स घेताना कार्डधारकाला वार्षिक प्रिमियम भरावा लागतो. हा प्रिमियम कार्डच्या क्रेडिट लिमिटवर आधारित असतो. उदाहरणार्थ, एक लाख रुपयांच्या क्रेडिट लिमिटसाठी साधारणपणे वार्षिक ५०० रुपयांपर्यंत प्रिमियम आकारला जातो, तर जास्त लिमिट असलेल्या कार्डसाठी हा प्रिमियम १,००० रुपयांपेक्षा अधिक असू शकतो. मात्र, ऐनवेळी कुटुंबाला मोठ्या आर्थिक संकटातून वाचवण्यासाठी ही रक्कम फारच कमी मानली जाते.
या विम्यामुळे केवळ थकबाकी भरली जाते असे नाही, तर क्रेडिट कार्डवरील चक्रवाढ व्याज, दंडात्मक शुल्क आणि उशीर शुल्क देखील आकारले जात नाहीत. त्यामुळे मृत्यूनंतर कर्ज वाढत जाण्याची भीती राहत नाही. टर्म इन्शुरन्सच्या तुलनेत हा विमा स्वस्त असून त्याचा उपयोग विशिष्ट गरजेसाठी थेट होतो.
मात्र, विमा घेताना काही गोष्टी तपासणे अत्यंत महत्त्वाचे आहे. विमा कंपनी थेट बँकेत पैसे जमा करते का, क्लेम प्रक्रिया किती सोपी आहे, तसेच विमा कंपनीचा क्लेम सेटलमेंट रेशो किती आहे, याची माहिती घेणे गरजेचे आहे. त्यामुळे क्रेडिट कार्ड घेताना केवळ ऑफर्स न पाहता, विमा संरक्षणाची सविस्तर माहिती बँकेकडून घ्यावी, असा सल्ला आर्थिक तज्ज्ञ देतात.
