Mumbai Pune Missing Link : मुंबई-पुणे द्रुतगती मार्गावरील बहुप्रतिक्षित ‘मिसिंग लिंक’ प्रकल्प अखेर अंतिम टप्प्यात आला असून, येत्या मे महिन्याच्या सुरुवातीला हा मार्ग वाहतुकीसाठी खुला होणार असल्याची माहिती महाराष्ट्र राज्य रस्ते विकास महामंडळाकडून (MSRDC) देण्यात आली आहे.
या प्रकल्पामुळे बोरघाटातील धोकादायक वळणं, तीव्र उतार-चढाव आणि वारंवार होणारे अपघात कायमचे इतिहासजमा होणार आहेत. त्यामुळे मुंबई आणि पुणे दरम्यानचा प्रवास अधिक सुरक्षित, वेगवान आणि आरामदायी ठरणार आहे.
‘मिसिंग लिंक’ प्रकल्प खोपोलीजवळील बोरघाट परिसरात उभारण्यात येत आहे. सध्या वापरात असलेल्या मार्गावर तीव्र वळणांमुळे वाहतूक कोंडी, अपघातांचे प्रमाण वाढते तसेच प्रवासासाठी जास्त वेळ लागतो. ही अडचण दूर करण्यासाठी सुमारे १३.३ किलोमीटर लांबीचा पर्यायी मार्ग विकसित करण्यात आला आहे.
या नव्या मार्गात दोन लांब बोगदे आणि उंच केबल-स्टे पूल उभारण्यात आले असून, त्यामुळे सध्याच्या मार्गाच्या तुलनेत सुमारे ६ किलोमीटर अंतर कमी होणार आहे. या महत्त्वाकांक्षी प्रकल्पासाठी सुमारे ६,५९५ कोटी रुपयांचा खर्च करण्यात आला आहे.
प्रकल्पात अत्याधुनिक तंत्रज्ञानाचा वापर करण्यात आला आहे. बोगद्यांमध्ये आधुनिक प्रकाशयोजना, वायुवीजन प्रणाली, सीसीटीव्ही कॅमेरे, आपत्कालीन संपर्क यंत्रणा आणि अग्निसुरक्षा सुविधा बसवण्यात आल्या आहेत.
तसेच भूस्खलन रोखण्यासाठी विशेष संरचना आणि पावसाळ्यातही सुरक्षित वाहतूक होईल अशी ड्रेनेज व्यवस्था करण्यात आली आहे. त्यामुळे पावसाळ्यातील प्रवासही अधिक सुरक्षित होणार आहे.
अधिकाऱ्यांच्या माहितीनुसार, रस्त्याचे डांबरीकरण, सुरक्षारेषा, दिशादर्शक फलक आणि चाचणी प्रक्रिया एप्रिल महिन्यात पूर्ण केली जाणार आहे. त्यानंतर तांत्रिक तपासणी करून मार्ग मे महिन्याच्या सुरुवातीला खुला केला जाणार आहे. प्रशासनाचा भर पावसाळ्यापूर्वी हा मार्ग सुरू करण्यावर आहे.
‘मिसिंग लिंक’ सुरू झाल्यानंतर मुंबई-पुणे प्रवासाचा कालावधी सरासरी २० ते २५ मिनिटांनी कमी होणार आहे. अवजड वाहनांसाठी हा मार्ग मोठा दिलासा ठरणार असून, इंधन बचत, वाहतूक कोंडी कमी होणे आणि कार्बन उत्सर्जनात घट होण्यास मदत होणार आहे.
औद्योगिक वाहतूक, पर्यटन तसेच आपत्कालीन सेवांसाठीही हा प्रकल्प अत्यंत उपयुक्त ठरणार असून, राज्याच्या पायाभूत सुविधांमध्ये हा एक महत्त्वाचा मैलाचा दगड ठरेल, असा विश्वास व्यक्त केला जात आहे.
