शिर्डी नगरीत १२ ते १६ ऑक्टोबर २०२५ या कालावधीत एक अत्यंत भव्य आणि अध्यात्मिक असा शिवपुराण कथा महोत्सव होणार आहे. या पवित्र कार्यक्रमात सुप्रसिद्ध कीर्तनकार परमपूज्य प्रदीपजी मिश्रा महाराज स्वतः मार्गदर्शन करणार असल्याची माहिती डॉ. सुजय विखे पाटील यांनी दिली.
या आयोजनाच्या निमित्ताने डॉ. विखे पाटील यांनी मध्यप्रदेशातील सीहोर जिल्ह्यात वसलेल्या कुबेरेश्वर धाम येथे जाऊन महाराजांची भेट घेतली. त्यांना शिर्डीमध्ये होणाऱ्या या अध्यात्मिक सोहळ्यासाठी औपचारिक आमंत्रण दिले. महाराजांनीही या निमित्ताने शिर्डीला येण्याचे निश्चित केले आहे.
या शिवकथा महोत्सवाचे आयोजन विखे पाटील कुटुंबाच्या वतीने केले जात असून या कार्यक्रमामागे एक खास सामाजिक प्रेरणा आहे. शिर्डी आणि अहिल्यानगर परिसरातील अनेक माता-भगिनींनी गेल्या काही महिन्यांपासून अशी विनंती केली होती की त्यांच्या गावातही अशी भक्तिमय कथा व्हावी.
त्यांच्या या आस्थेने भरलेल्या मागणीला सकारात्मक प्रतिसाद देत डॉ. सुजय विखे पाटील यांनी या अध्यात्मिक कार्यक्रमाचे आयोजन करण्याचा निर्णय घेतला आहे.हा कार्यक्रम केवळ कथा ऐकण्यापुरता मर्यादित नसून, आत्मशुद्धी, जीवनदृष्टी आणि अध्यात्मिक उन्नती यासाठी महत्त्वपूर्ण ठरणार आहे.
या पावन महोत्सवात पाच लाखांहून अधिक भाविकांच्या उपस्थितीची अपेक्षा आहे.शिवकथा ही केवळ एक धार्मिक परंपरा नसून ती जीवनाला नवा प्रकाश देणारा अनुभव आहे. त्यामुळे सर्वांनी या महोत्सवात सहभागी व्हावे असे आवाहन डॉ. सुजय विखे पाटील यांनी केले आहे.
