चास (ता. नगर) येथे पुण्यश्लोक अहिल्यादेवी होळकर यांच्या स्मरणार्थ 588 कोटी रुपये खर्चून भव्य स्मारक उभारण्याचा जिल्हा प्रशासनाचा प्रस्ताव तयार करण्यात आला आहे. हा प्रस्ताव राज्य सरकारकडे सादर केला असून, अद्याप त्याला अंतिम मंजुरी मिळालेली नाही. 66 एकर जागेवर उभारल्या जाणाऱ्या या सृष्टीला राष्ट्रीय स्मारकाचा दर्जा देण्याची योजना आहे.
या सृष्टीमध्ये स्त्रियांना सशक्त करण्यासाठी विशेष केंद्र उभारले जाणार असून, त्यामार्फत महिलांसाठी विविध उपक्रम राबवले जातील. मध्यप्रदेशातील महेश्वर येथे अहिल्यादेवींनी उभारलेल्या मंदिरांचा अभ्यास करून आणि तेथील पुतळ्याची पाहणी करून येथे 90 फूट उंच पुतळा उभारला जाणार आहे.
याच सृष्टीत “एआय संग्रहालय” तसेच मोफत कायदेशीर सल्ला देणारे वकील केंद्रही असणार आहे. त्यामुळे महिलांना त्यांच्या हक्कांबाबत अधिक माहिती मिळेल आणि त्यांना कायदेशीर सल्ला सहज मिळू शकेल.
स्त्री सक्षमीकरण केंद्रामध्ये प्रदर्शन हॉल, भारतातील महिलांच्या अभ्यासासाठी ग्रंथालय, मार्गदर्शन केंद्र, पाककृती उपहारगृह आणि महिला उद्योजकांसाठी उत्पादन-विक्री बाजारपेठ उपलब्ध केली जाणार आहे. हे केंद्र महिला सबलीकरणासाठी एक महत्त्वाचा टप्पा ठरेल, असा विश्वास व्यक्त केला जात आहे.
पालकमंत्री राधाकृष्ण विखे यांनी चास येथे स्त्री सक्षमीकरण केंद्र उभारण्यासाठी जिल्हा प्रशासनाच्या मदतीने 588 कोटींचा प्रस्ताव तयार करून तो मंत्रालयात पाठवला आहे. मात्र, सभापती राम शिंदे यांनी चौंडी येथे गुजरातच्या “स्टॅच्यू ऑफ युनिटी”च्या धर्तीवर अहिल्यादेवींचा भव्य पुतळा उभारण्याचा प्रस्ताव दिला आहे. त्यामुळे हा प्रकल्प नक्की कुठे आणि कशा प्रकारे होणार, याबद्दल संभ्रम निर्माण झाला आहे.
योजनेच्या आराखड्यात 90 फूट उंच अहिल्यादेवींच्या पुतळ्याच्या आजूबाजूला 60 मीटर रुंद भुयारी मार्ग असेल. याशिवाय, तेथील दूरचित्रवाणी प्रणालीद्वारे अहिल्यादेवींच्या ऐतिहासिक कार्याची माहिती दिली जाईल. समाजसेवा, मंदिर पुनरुत्थान, प्रशासन, सैन्यबांधणी आणि समाजहिताचे विविध उपक्रम इथे प्रदर्शित केले जातील.
या केंद्रात महिलांसाठी स्पर्धा परीक्षा केंद्र, हस्तकला केंद्र, रोजगार निर्मिती केंद्र, सेंद्रिय शेती आणि पशुसंवर्धन प्रदर्शन केंद्र देखील असणार आहे. हे सर्व उपक्रम महिलांना आर्थिक आणि सामाजिकदृष्ट्या सक्षम बनवण्याच्या उद्देशाने राबवले जातील.
