प्रजासत्ताक दिनाच्या सकाळी पुणे-नाशिक राष्ट्रीय महामार्गावर माळवाडी शिवारात झालेल्या कार अपघातात पती-पत्नीचा दुर्दैवी मृत्यू झाला आहे, तर एका महिलेला गंभीर दुखापत झाली आहे. अपघात इतका भीषण होता की कारचा अक्षरशः चुराडा झाला. हा हृदयद्रावक अपघात सकाळी साडेआठच्या सुमारास घडला.
पुण्यातील गुरुवार पेठेतील दरेकर वाड्यातील सचिन वसंतराव दरेकर (वय 57), त्यांची पत्नी रमा सचिन दरेकर (वय 53), सीमा सुरेंद्र देशमुख आणि सुरेंद्र देशमुख हे चौघे पहाटे साडेपाच वाजता नाशिकला एका लग्नासाठी जात होते. त्यांच्या कारने माळवाडी शिवारात प्रवेश केला असता, अपघात झाला.
अपघातानंतर जखमींना तात्काळ आळेफाट्यातील खासगी रुग्णालयात हलवण्यात आले. मात्र, सचिन आणि रमा दरेकर यांना उपचार सुरू होण्याआधीच मृत घोषित करण्यात आले. गंभीर जखमी असलेल्या सीमा देशमुख यांच्यावर सध्या उपचार सुरू आहेत.
घारगाव पोलीस ठाण्याचे पोलीस निरीक्षक दिगंबर भदाणे आणि त्यांच्या पथकाने तातडीने घटनास्थळी धाव घेतली. पोलीस पथकात प्रमोद गाडेकर, सुभाष बोडखे, साईनाथ दिवटे यांनी अपघातस्थळाची पाहणी केली.
मयत सचिन दरेकर यांचे भाऊ सतीष वसंतराव दरेकर यांनी पोलिसांना खबरी दिली असून, या प्रकरणी अकस्मात मृत्यूची नोंद घेण्यात आली आहे. पुढील तपास सहाय्यक पोलीस निरीक्षक कल्पेश दाभाडे करत आहेत.
या अपघातामुळे दरेकर कुटुंबीयांवर दुःखाचा डोंगर कोसळला आहे. या दुर्दैवी घटनेने संपूर्ण परिसरात हळहळ व्यक्त केली जात आहे. कुटुंबासाठी हा मोठा आघात असून, शोकाकुल वातावरण पसरले आहे.
महामार्गावरील अपघातांची वाढती संख्या आणि त्यामागील कारणे ही पुन्हा चर्चेचा विषय बनली आहे. या घटनेने महामार्गावरील सुरक्षेच्या उपाययोजना आणि वाहतुकीच्या नियमांचे पालन करण्याचे महत्त्व अधोरेखित केले आहे.
