अहिल्यानगर- शहरात आग लागल्याची बातमी समजताच महापालिकेच्या अग्निशमन विभागाचे कर्मचारी अवघ्या काही मिनिटांत घटनास्थळी पोहोचण्यासाठी सज्ज होतात. ‘सावेडीत आग लागली आहे, त्वरित यावे,’ असा फोन १०१ या टोल-फ्री क्रमांकावर येताच कर्मचारी तात्काळ पत्त्याची नोंद करतात आणि अग्निशमन वाहन घटनास्थळाकडे रवाना होते.
रस्ते मोकळे असल्यास पाच ते दहा मिनिटांत दल घटनास्थळी दाखल होते. रात्रंदिवस कार्यरत असलेल्या या विभागाची तत्परता आणि आव्हाने याविषयी जाणून घेऊया.
अग्निशमन दलाची कार्यपद्धती
अग्निशमन विभाग २४ तास सतर्क असतो. उन्हाळ्यात उष्णता वाढल्याने आगीच्या घटना वाढतात, त्यामुळे या काळात विशेष खबरदारी घ्यावी लागते. आग विझवण्यासाठी लागणारे पाणी, फोम, पाइप, आणि इतर साहित्य नेहमी तयार ठेवावे लागते. वाहनांची नियमित तपासणी आणि देखभालही तितकीच महत्त्वाची आहे. एखादी घटना घडल्याची माहिती मिळताच कर्मचारी तत्काळ सज्ज होतात आणि वाहनासह रवाना होतात. या तत्पर सेवेमुळे अनेकदा मोठे नुकसान टळते.
रस्त्यातील अडथळे
शहरातील वाहतूक कोंडी, अरुंद गल्ल्या आणि अतिक्रमणे यामुळे अग्निशमन वाहनांना घटनास्थळी पोहोचण्यास अडचणी येतात. अहिल्यानगरमधील अनेक रहिवासी भागांमध्ये मोठ्या वाहनांना जाण्यासाठी पुरेसा रस्ताच उपलब्ध नाही.
यामुळे कितीही तत्परता दाखवली, तरी काही मिनिटांचा विलंब होऊ शकतो. नागरिकांनी रस्ते मोकळे ठेवण्यासाठी सहकार्य करणे गरजेचे आहे, जेणेकरून आपत्कालीन वाहनांना अडथळा येणार नाही.
अत्याधुनिक उपकरणांची गरज
अहिल्यानगरात उंच इमारतींची संख्या वाढत आहे. अशा इमारतींच्या वरच्या मजल्यांवर आग लागल्यास तिथे तात्काळ मदत पोहोचवणे आव्हानात्मक आहे. सध्याच्या अग्निशमन विभागाकडे यासाठी आवश्यक अत्याधुनिक उपकरणांची कमतरता आहे. यामुळे विभागाचे आधुनिकीकरण आणि नवीन तंत्रज्ञानाचा समावेश करणे अत्यंत आवश्यक आहे. यामुळे उंच इमारतींमधील आगीवर त्वरित नियंत्रण मिळवणे शक्य होईल.
५६ कर्मचारी कार्यरत
महापालिकेच्या अग्निशमन विभागात ५६ कर्मचारी कार्यरत आहेत, यापैकी १६ कायमस्वरूपी, तर ४० आऊटसोर्सिंगद्वारे नियुक्त आहेत. शहरात आग, अपघात, पूर किंवा इतर आपत्कालीन परिस्थितीत हे दल त्वरित मदतीसाठी धावून जाते. जुन्या महापालिका परिसरात आणि सावेडी येथे प्रत्येकी एक अग्निशमन केंद्र आहे. या केंद्रांवर चार वाहने उपलब्ध आहेत, यात एक पाण्याचा बंब, एक फोमचा बंब आणि दोन शीघ्र प्रतिसाद वाहने यांचा समावेश आहे.
नागरिकांचे सहकार्य आवश्यक
अग्निशमन दल केवळ आग विझवण्यापुरते मर्यादित नाही. पूर, अपघात, अडकलेले प्राणी यांसारख्या आपत्कालीन परिस्थितीतही मदत करते. मात्र, रस्त्यांवरील अडथळ्यांमुळे त्यांच्या कार्यात अनेकदा अडचणी येतात.
“नागरिकांनी रहिवासी परिसरात किमान वाहन जाईल इतका रस्ता मोकळा ठेवावा,” असे आवाहन अग्निशमन विभागाचे प्रमुख शंकर मिसाळ यांनी केले आहे. अशा सहकार्यामुळे मदत कार्य अधिक वेगाने आणि प्रभावीपणे होऊ शकेल.
