मारुती सुझुकी डिझायर किती मायलेज देते ? समोर आली आकडेवारी

मारुती सुझुकीने अलीकडेच त्यांच्या चौथ्या पिढीतील मारुती डिझायर फेसलिफ्ट भारतीय बाजारपेठेत लाँच केली आहे. मारुती डिझायर ही भारतातील एंट्री-लेव्हल सेडान कारसाठी सर्वात लोकप्रिय पर्याय मानली जाते. नव्या पिढीतील डिझायर अधिक आधुनिक डिझाइन, सुधारित इंजिन आणि उत्तम फीचर्ससह सादर करण्यात आली आहे. आता तिच्या मायलेजची सर्व माहिती समोर आली असून, ती ग्राहकांसाठी एक आकर्षक पर्याय बनली आहे.

नवीन मारुती डिझायर फेसलिफ्ट अधिक सुधारित मायलेज, आधुनिक फीचर्स आणि उत्तम सुरक्षिततेसह सादर करण्यात आली आहे. पेट्रोल आणि CNG दोन्ही पर्यायांमध्ये उपलब्ध असलेल्या या कारची इंधन कार्यक्षमता ग्राहकांसाठी मोठा आकर्षण ठरू शकते. जर तुम्हाला उत्कृष्ट मायलेज आणि आधुनिक तंत्रज्ञानाने सुसज्ज असलेली किफायतशीर सेडान हवी असेल, तर ही कार निश्चितच एक उत्तम पर्याय आहे.

इंजिन आणि परफॉर्मन्स

नवीन मारुती डिझायर फेसलिफ्टमध्ये 1.2-लिटर, तीन-सिलेंडर Z12E पेट्रोल इंजिन दिले आहे, जे 80 बीएचपी आणि 112 एनएम टॉर्क निर्माण करते. याशिवाय, कंपनीने याची CNG आवृत्ती देखील सादर केली आहे, जी 69 बीएचपी आणि 102 एनएम टॉर्क निर्माण करते. या इंजिनमध्ये आयडल स्टार्ट-स्टॉप फीचर आहे, जे इंधन कार्यक्षमतेत मोठी भर घालते. गाडीमध्ये 5-स्पीड मॅन्युअल आणि 5-स्पीड एएमटी ट्रान्समिशन पर्याय उपलब्ध आहेत. कंपनीच्या दाव्यानुसार, पेट्रोल एएमटी व्हेरिएंटचे मायलेज 25.71 किमी प्रति लिटर आहे, जे सेगमेंटमधील सर्वात जास्त मायलेजपैकी एक आहे.

मायलेज चाचणी

Carwale.com ने केलेल्या चाचणीनुसार, शहरातील वाहतुकीत गाडीने 14.1 किमी प्रति लिटर मायलेज दिले, जे शहरातील ड्रायव्हिंगसाठी उत्तम मानले जाते. हायवेवर चाचणी दरम्यान, 80.8 किमी प्रवासासाठी 4.6 लिटर इंधन वापरण्यात आले, त्यामुळे हायवे मायलेज 19.42 किमी प्रति लिटर इतके नोंदवले गेले. ही मायलेज कामगिरी मारुती डिझायरला सेडान सेगमेंटमध्ये उत्तम स्थान देईल.

आकर्षक फीचर्स

नवीन मारुती डिझायर फेसलिफ्टमध्ये 9-इंचाचा टचस्क्रीन इन्फोटेनमेंट सिस्टम आहे, जो Android Auto आणि Apple CarPlay सपोर्ट करतो. अॅनालॉग इन्स्ट्रुमेंट क्लस्टर, वायरलेस मोबाइल चार्जिंग, 15-इंच डायमंड कट अलॉय व्हील्स, आणि ऑटोमॅटिक एसी कंट्रोल यासारखी अनेक प्रीमियम फीचर्स देण्यात आली आहेत. सुरक्षिततेच्या दृष्टीने, 6 एअरबॅग्ज, 360-डिग्री कॅमेरा, इलेक्ट्रॉनिक स्थिरता नियंत्रण (ESC) आणि क्रूझ कंट्रोल यासारखी फीचर्स दिली आहेत. ग्लोबल एन-कॅपने या कारला 5-स्टार सेफ्टी रेटिंग दिले आहे, ज्यामुळे ती अधिक सुरक्षित ठरते.