IPS Sudhakar Pathare : तेलंगणात महाराष्ट्रातील आयपीएस अधिकारी सुधाकर पठारे आणि त्यांचा भाऊ भागवत खोडके यांचा एका भीषण अपघातात मृत्यू झाला आहे. हा अपघात तेलंगणातील श्रीशैलम घाट परिसरात झाला, जिथे ते दोघेही श्रीशैलम ज्योतिर्लिंगाच्या दर्शनासाठी जात होते. या दुर्घटनेत त्यांच्या कारला बसने जोरदार धडक दिली, ज्यामुळे दोघांचाही जागीच मृत्यू झाला.
सुधाकर पठारे हे महाराष्ट्र पोलीस दलातील वरिष्ठ अधिकारी होते आणि सध्या ते उपायुक्त (डीसीपी) पदावर कार्यरत होते. ते आपल्या भावासह इनोव्हा कारमधून प्रवास करत होते. ही घटना दुपारी १२ च्या सुमारास नगरकुरनूलजवळील घाटात घडली.
सुधाकर यांच्या डोक्याला गंभीर दुखापत झाली, तर भागवत यांच्या पोटात आणि पायाला अंतर्गत जखमा झाल्या. अपघातानंतर त्यांना तातडीने जवळच्या खासगी रुग्णालयात हलवण्यात आलं, पण तिथे पोहोचताच डॉक्टरांनी दोघांना मृत घोषित केलं. नगरकुरनूलचे पोलीस अधीक्षक वैभव गायकवाड यांनी सांगितलं की, दोघांचं शवविच्छेदन करण्यात आलं आहे.
सुधाकर पठारे हे २०११ च्या बॅचचे आयपीएस अधिकारी होते आणि मूळचे नगर जिल्ह्यातील पारनेर तालुक्यातील वाळवणे गावचे रहिवासी होते. त्यांनी एम.एस्सी. अ‍ॅग्री आणि एलएलबीची पदवी मिळवली होती.
आयपीएस होण्यापूर्वी त्यांनी सरकारी सेवेत विविध पदांवर काम केलं होतं. १९९५ मध्ये ते जिल्हा विशेष लेखा परीक्षक झाले, १९९६ मध्ये विक्रीकर अधिकारी (वर्ग १) म्हणून निवड झाली आणि १९९८ मध्ये पोलीस उपअधीक्षक म्हणून त्यांनी पोलीस सेवेत प्रवेश केला.
त्यांनी पंढरपूर, अकलूज, कोल्हापूर, राजुरा येथे पोलीस उपअधीक्षक म्हणून काम केलं. त्यानंतर अप्पर पोलीस अधीक्षक म्हणून चंद्रपूर आणि वसई येथे, तसंच सीआयडी अमरावती येथे पोलीस अधीक्षक म्हणून त्यांनी सेवा दिली.
मुंबई, ठाणे, पुणे, वाशी, नवी मुंबई यासारख्या शहरांमध्ये पोलीस उपायुक्त म्हणून त्यांनी उत्कृष्ट कामगिरी बजावली. सुधाकर पठारे यांनी संघटित गुन्हेगारीविरुद्ध मोक्का, तडीपारी, एमपीडीए यांसारख्या कठोर कारवाया केल्या आणि कायदा व सुव्यवस्था राखण्यात महत्त्वाची भूमिका निभावली. पोलीस दलात त्यांनी अनेक नाविन्यपूर्ण उपक्रमही राबवले होते
