शेती म्हटले म्हणजे आपल्या डोळ्यासमोर अगोदर उभे राहते ते काबाडकष्ट करणारा आणि घामाने ओलाचिंब झालेला शेतकरी होय. शेतीमध्ये आज देखील तितकेच कष्ट शेतकरी राजाला घ्यायला लागतात. परंतु आता तंत्रज्ञान आल्यामुळे तेथील बरीच कामे आता सरळ व सोपे झाल्यामुळे बऱ्यापैकी शेतकऱ्यांचे कष्ट कमी होण्यास मदत झाली आहे व तंत्रज्ञानाच्या मदतीने कमीत कमी क्षेत्रामध्ये देखील आता लाखो रुपयांचे उत्पन्न शेतकरी घेऊ लागले आहेत.
तुमच्याकडे किती शेती आहे यापेक्षा तुमच्याकडे जे शेती क्षेत्र उपलब्ध आहे त्यामध्ये तंत्रज्ञानाचा कौशल्यपूर्ण वापर करून आणि आधुनिक अशा पिकांची लागवड करून कमी क्षेत्रामध्ये देखील शेतकरी लाखो रुपये कमवत आहेत.
अगदी याच मुद्द्याला धरून जर आपण कडेगाव तालुक्यातील देवराष्ट्रे येथील जगन्नाथ मोरे या शेतकऱ्याचे उदाहरण घेतले तर हा मुद्दा आपल्याला पटेल. अवघ्या दीड एकरमध्ये दोनच महिन्यात सात लाख लाख रुपयांचा नफा मिळवण्यात हा शेतकरी यशस्वी ठरले आहेत. त्यांची यशोगाथा आपण या लेखात बघणार आहोत.
जगन्नाथ रावांना झुकिनी पिकाने केले लखपती
याबाबत सविस्तर वृत्त असे की, कडेगाव तालुक्यातील देवराष्ट्रे या गावचे शेतकरी जगन्नाथ महादेव मोरे यांनी दीड एकर क्षेत्रामध्ये झुकिनी या पिकाची लागवड केली व या पिकाच्या उत्पादनातून दोन महिन्यात दहा टनाचे उत्पादन घेऊन सात लाख रुपये नफा त्यांनी मिळवला आहे.
झुकिनी तसे ऐकायला हे नवीन नाव आहे. परंतु हे एक भाजीपाला वर्गातील पीक असून लागवडीनंतर साधारणपणे एक महिन्यात त्याचे उत्पादन सुरू होते. जर आपण झुकीनी या पिकाचा कालावधी पाहिला तर तो लागवड केल्यापासून फक्त दोन महिन्याचा आहे.
कशा पद्धतीने केले व्यवस्थापन?
जेव्हा जगन्नाथ मोरे यांनी झुकिनी लागवड करायचे निश्चित केले तेव्हा शेतीची तयारी करण्याच्या दृष्टिकोनातून त्यांनी दीड एकर क्षेत्रामध्ये अगोदर बेड तयार करून घेतले व यावर मल्चिंग पेपर अंथरून एक फूट अंतरावर झुकिनी पिकाची लागवड केली व लागवडीसाठी त्यांनी वेलकम क्लोज नावाच्या जातीची निवड केली.
पाणी व्यवस्थापनासाठी ठिबकचा कौशल्यपूर्ण वापर केला व पिकाला आळवणी तसेच गरजेनुसार पिकाला फवारणीचे नियोजन देखील त्यांनी उत्तम ठेवले व एका महिन्यामध्ये त्यांना झुकिनी पिकापासून उत्पादन मिळायला लागले. या एका महिन्यामध्ये त्यांनी दहा टन उत्पादन मिळवले. या पिकाची तोडणी दररोज करावी लागते.
कसे केले विक्री व्यवस्थापन?
जगन्नाथरावांनी झुकिनी लागवड केल्यानंतर जेव्हा उत्पादन सुरू झाले तेव्हा दररोज या पिकाची तोडणी करून तो सगळा माल त्यांनी मुंबई मार्केटला पाठवला व त्या ठिकाणी 70 ते 100 रुपये किलो या दराने त्यांनी पिकवलेली झुकिनी विकली गेली.
बाजार भाव चांगला मिळाल्यामुळे त्यांना तब्बल सात लाख रुपयांचा नफा या दीड एकर क्षेत्रामध्ये झाला. तसे पाहायला गेले तर ते भाजीपाला पिकांचे उत्पादन घेण्यामध्ये तरबेज आहेतच व त्याचाच फायदा त्यांना या झुकिनी लागवड व त्याचे उत्पादनामध्ये झाला.
ते दरवर्षी या पिकाच्या माध्यमातून चांगला नफा मिळवतात. विशेष म्हणजे या पिकाचा कालावधी कमी असतो व होणारा खर्च देखील कमी प्रमाणात असतो. परंतु फळ मात्र वजनाने चांगले असल्याने मिळणारा नफा हा जास्त राहतो असे देखील त्यांनी सांगितले.
