Sweet Corn Cultivation:- कुठल्याही क्षेत्रामध्ये जेव्हा आपण काम करत असतो तेव्हा त्यामध्ये परिस्थितीनुसार बदल करणे गरजेचे असते.जर आपण आहे तीच पद्धत वापरत राहिलो किंवा कुठल्याही गोष्टीत बदल केला नाही तर कालांतराने त्यापासून फायदा होण्याऐवजी नुकसान होण्याची शक्यता असते.
अगदी हेच तत्व शेतीक्षेत्राला देखील लागू होते. शेतीमध्ये देखील जर तुम्ही त्याच त्याच गोष्टी परत करत राहिलात किंवा तीच शेतीची पद्धत अवलंबली तर शेतीमधून खर्चाच्या मानाने तुम्हाला असलेल्या अपेक्षेपेक्षा खूपच कमी उत्पादन मिळते व त्यामुळे हवा तो पैसा हातात येत नाही.
जर आपण मागील दशकातील शेती आणि आत्ताची शेती यामधील जर फरक बघितला तर आताच्या शेतीमध्ये खूप मोठ्या प्रमाणावर तंत्रज्ञानाचा वापर होत असल्याने आणि अनेक नवनवीन पिकांचे वाण विकसित झाल्यामुळे त्या पद्धतीने शेतीमध्ये बदल करणे क्रमप्राप्त आहे.
शेतकरी बदलत्या परिस्थितीनुसार शेतीमध्ये बदल स्वीकारतात व त्यामुळे नक्कीच शेतीमध्ये भरघोस उत्पादन मिळवणे शक्य होते व त्या माध्यमातून चांगला पैसा देखील मिळवता येतो. तसेच शेतीच्या बाबतीत बघितले तर पिकांची लागवड करताना बाजारपेठेचा अभ्यास करून मग नियोजन करणे ही देखील काळाची गरज आहे.
अगदी याच मुद्द्याला धरून जर आपण जळगाव जिल्ह्यातील भडगाव तालुक्यात असलेल्या कोठली निंभोरा येथील दिलीप पाटील, शरद पाटील व नाना पाटील या तीन शेतकऱ्यांची यशोगाथा बघितली तर त्यांनी स्वीट कॉर्न म्हणजेच गोड मक्याची लागवड केली व यातून 85 दिवसांमध्ये कमीत कमी खर्चात एकरी लाखो रुपयापर्यंत नफा मिळवला.
विशेष म्हणजे मका व्यापाऱ्यांनी हा मका त्यांच्या शेताच्या बांधावर येऊन 12.5 रुपये प्रतिकिलो दराने विकत घेतला व काही मक्याची कणसे तोडून त्यांनी तेलंगणा तसेच मध्यप्रदेश व गुजरात राज्यामध्ये देखील विकली.
नेहमीच्या मक्यापेक्षा स्वीट कॉर्न म्हणजे गोड मका कसा आहे वेगळा?
आपण जो काही नियमित म्हणजेच नेहमीचा मका लावतो तो यायला साधारणपणे चार ते पाच महिन्यांच्या आत बाहेर कालावधी लागतो. तसेच मागील काही वर्षांपासून मका पिकावर देखील फवारण्या कराव्या लागत असल्याने त्याचा खर्च देखील वाढतो. म्हणजेच गोड मक्याच्या तुलनेमध्ये या मक्याचा उत्पादन खर्च हा जवळपास दुप्पट असतो.
त्याच्या लागवडीपासून तर काढणी पर्यंतचा खर्च जास्त येतो आणि त्यामानाने मात्र क्विंटलला पंधराशे ते दोन हजार रुपयांचा भाव मिळतो. तसेच मक्याच्या चाऱ्याला देखील जास्त मागणी नसते. बऱ्याचदा शेतकऱ्यांना मोफत हा चारा द्यावा लागतो अशी परिस्थिती आपल्याला दिसून येते. त्या तुलनेत मात्र गोड मक्याचा विचार केला तर गोड मक्याच्या चाऱ्याला देखील चांगला दर असतो.
गोड मक्याच्या चाऱ्यामध्ये कॅल्शियमचे प्रमाण जास्त असते. त्यामुळे पशुपालन करणारे शेतकऱ्यांकडून गोड मक्याच्या चाऱ्याला खूप मागणी असते. गोड मक्याचा चारा एकरी वीस हजाराच्या आसपास देखील विकला जातो. सध्या भडगाव तालुक्यातील कोठली निंभोरा या परिसरातील अनेक गावांमध्ये गोड मक्याचे पीक घेताना शेतकरी दिसून येत आहेत.
यामध्ये दिलीप पाटील या शेतकऱ्याने मोसंबी पिकामध्ये आंतरपीक म्हणून सप्टेंबरमध्ये गोड मक्याची लागवड केली होती अडीच महिन्यानंतर मक्याची कणसे तोडून प्रति किलो 12.50 प्रतिकिलो इतका दर त्यांना शेताच्या बांधावर मिळाला. यामध्ये त्यांना 50 क्विंटल मक्याची कणसे मिळाली व हा माल विकून 62500 मध्ये त्यांनी विकला व चारा पंचवीस हजारांचा झाला. म्हणजेच वीस हजार रुपयांचा खर्च करून त्यांना 67 हजार पाचशे रुपये नफा मिळाला.
तसेच याच गावचे दुसरे शेतकरी शरद पाटील यांनी 25 सप्टेंबरला एक एकरामध्ये गोड मका पिकाची लागवड केली होती याकरता त्यांना संपूर्ण खर्च 15 हजार रुपये आला. साधारणपणे लागवडीनंतर 85 दिवसात हे उत्पन्न हाती मिळाले 80 हजार रुपये एकरी उत्पन्न त्यांना मिळाले.
तिसरे शेतकरी नाना पाटील यांनी देखील दीड एकर क्षेत्रामध्ये एक सप्टेंबरला गोड मका पिकाची लागवड केली व त्या माध्यमातून त्यांना 65 क्विंटल मक्याचे उत्पादन मिळाले व 12.50 रुपये प्रति किलो या दराने 81,200 रुपयांचे उत्पन्न त्यांना मिळाले.
तसेच चारा वीस हजार रुपयांना विकला गेला. या पिकासाठी त्यांना 25 हजार रुपये खर्च आला होता. म्हणजेच कमी कालावधीत आणि कमी खर्चात चांगला नफा मिळवण्याच्या दृष्टिकोनातून गोड मक्याची लागवड ही शेतकऱ्यांसाठी नक्कीच फायद्याची ठरू शकते हे आपल्याला या तिघा शेतकऱ्यांच्या उदाहरणावरून दिसून येते.
