अहमदनगर Live24 टीम, 24 मे 2021 :- देवळाली प्रवरा येथील नगरपालिका इमारतीमध्ये सुरू असलेले खासगी कोविड सेंटर शासकीय करावे किंवा नागरिकांना मोफत सुविधा देणेसाठी नगरपालिकेने स्वतः ते कोविड सेंटर चालवावे अन्यथा नगरपालिकेच्या गेट समोर आमरण उपोषण करणार असल्याचे आंतरराष्ट्रीय खेळाडू आप्पासाहेब ढुस यांनी अहमदनगरचे जिल्हाधिकारी डॉ राजेंद्र भोसले साहेब यांना पाठविलेल्या निवेदनात म्हंटले आहे.
इमारत नगरपालिकेची, पाणी नगरपालिकेचे, वीज नगरपालिकेची, सफाई कामगार नगरपालिकेचे मग कोविड सेंटरच खाजगी का? असा देवळाली प्रवराच्या नागरिकांना प्रश्न पडला आहे.
नगरपालिकेच्या मालमत्तेमध्ये खाजगी कोविड सेंटर चालवून रुग्णाला भरमसाठ बिलाची आकारणी कशी काय करू शकता असा सवाल आप्पासाहेब ढुस यांनी विचारून तात्काळ हे कोविड सेंटर शासकीय करा नाहीतर चले जाव आंदोलन छेडावे लागेल असा इशारा दिला होता.
तसेच चार दिवसाचे चाळीस हजार रुपये बिल भरायला पैसे नसल्याने या खाजगी कोविड सेंटरमध्ये अडकून पडलेल्या देवळाली प्रवरा येथीलच रुग्णाला सोडवायला आंदोलन करायची वेळ आल्याने ढुस यांनी अहमदनगर चे जिल्हाधिकारी यांना आमरण उपोषणाचे निवेदन दिले आहे.
निवेदनात ढुस यांनी म्हंटले आहे की, देवळाली प्रवरा नगरपालिकेच्या इमारतीमध्ये सुरू असलेल्या खाजगी कोविड सेंटरची माहिती मिळणे कामी संदर्भीय पत्रान्वये आम्ही दि. १३ मे रोजी नगरपालिकेला विनंती केली आहे. तथापि आज पावेतो नगरपालिकेने आम्हास माहिती उपलब्ध करून दिली नाही.
त्यामुळे देवळाली प्रवरा नगरपालिकेच्या इमारती मध्ये सुरू असलेल्या खाजगी कोविड सेंटरमध्ये कोरोना रुग्णांची लूटमार होत असलेबद्दल आमची खात्री झाली आहे.
तसेच कोरोनाची तिसरी लाट येणेपूर्वी या खाजगी कोविड सेंटरमध्ये आणखी काही बेड वाढवून त्याचे शासकीय मोफत कोविड सेंटरमध्ये रुपांतर करावे किंवा नगरपालिकेने ते स्वतः चालवावे या बाबत आम्ही नगरपालिकेला वारंवार विनंती केली आहे.
त्यावरही नगरपालिकेने अद्याप पावेतो कोणताही निर्णय घेतला नाही. म्हणून आपणास विनंती की, (१) या खाजगी कोविड सेंटरची नगरपालिकेकडून माहिती मिळावी, (२) या कोविड सेंटरची चौकशी करून दोषींवर योग्य ती कारवाई करावी,
(३) या कोविड सेंटर मध्ये आणखी काही बेड वाढवून ते शासकीय कोविड सेंटर करावे, किंवा नगरपरिषदेने ते कोविड सेंटर स्वतः चालवीनेसाठी आवश्यक ती उपाययोजना करावी व येथील नागरिकांना मोफत सेवा उपलब्ध करून कोरोनाची तिसरी लाट येनेपूर्वी देवळाली प्रवरा परिसरातील नागरिकांना आश्वस्थ करावे.
आदी मागण्यासाठी गुरुवार दि. १० जून २०२१ रोजी सकाळी १०.०० वा. पासून आमच्या मागण्या मान्य होईपर्यंत देवळाली प्रवरा नगरपालिकेच्या गेट समोर आम्ही आमरण उपोषण करणार आहोत असे निवेदनात आप्पासाहेब ढुस यांनी म्हंटले असून
या निवेदनाची प्रत राज्याचे मुख्यमंत्री उद्धव ठाकरे, अहमदनगरचे जिल्हा पोलिस अधिक्षक साहेब तसेच राहुरी चे तहसीलदार व देवळाली प्रवरा नगरपालिकेचे मुख्याधिकारी यांना पाठविण्यात आल्या आहेत.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
