Offbeat monsoon destination : पक्ष्यांचा किलबिलाट, पाण्याचा खळखळाट असे निसर्गसौंदर्य लाभलेला विक्रमगडमधील पिकनिक पॉइंट म्हणजेच पलूचा धबधबा.
नंतर विक्रमगडकरांची शान असलेला व बारमाही पाणी असलेला खांडचा बंधारा असून निसर्गाने भरभरून दिलेल्या या भागात पावसाळ्यात मनसोक्त आनंद लुटण्यासाठी पर्यटकांची गर्दी वाढत आहे. विक्रमगड तालुक्याला निसर्गाने मुक्त उधळण करत सर्व काही भरभरून दिले आहे.
शनिवार व रविवारी खांडचा बंधारा येथे पर्यटकही येत असतात व पाण्यामध्ये डुंबण्याचा मनसोक्त आनंद लुटत असतात. विक्रमगड हा हरित पट्टा म्हणून ओळखला जात असला, तरी येथील सौंदर्यात विक्रमगडचा खांड बंधारा अधिक भर टाकत आहे.
त्यामुळे या ठिकाणाला भेट दिल्याशिवाय येथील पर्यटन दर्शन पूर्णच होत नाही. पावसाळा सुरू झाला की या नैसर्गिक सौंदर्यात भर घालतात ते येथील पांढरेशुभ्र धबधबे. विक्रमगडपासून डोंगर भागात उंचावर जंगल पसरलेले आहे.
हाच जंगलपट्टा निसर्ग मित्रांसाठी फार महत्त्वाचा आणि उपयुक्त आहे. विविध प्रजातींचे व रंगीबेरंगी पक्षीही येथे पाहावयास मिळत असल्याने पक्षी निरीक्षकही या भागात येतात. खांडचा बंधारा हा विक्रमगडपासून हाकेच्या अंतरावर आहे.
जून ते ऑक्टोबर या काळात येथे पर्यटक येतात. दगड व चिखलाची वाट तुडवतच येथे जावे लागते. या धबधब्यांवर पर्यटकांची गर्दी असते. मुंबई परिसर व अन्य ठिकाणांहून पर्यटक येथील निसर्गाचे अद्भुत रूप पाहावयास येतात.
पक्ष्यांचा किलबिलाट, पाण्याचा खळखळाट अशा निसर्ग संगीतातच येथे विविध प्रकारचे कीटक, फुलपाखरू, वनस्पती, वनौषधी आढळतात. या भागातील डोंगरमाथ्यावरून दिसणारे हिरवे साम्राज्य आणि त्यातून डोकावणारे छोटे छोटे धबधबे रोमांचित करतात.
त्यामुळे विक्रमगडचा खांडचा बंधारा खास आकर्षण ठरत आहे. विक्रमगडपासून अवघ्या एक किमी अंतरावर खांड गावानजीक हे प्रेक्षणीय स्थळ आहे. हा बंधारा पावसाळ्यात कायम पर्यटकांनी भरलेला असतो. विक्रमगडमधील शाळा, कॉलेजचे विद्यार्थी सहलीसाठी येथे वर्षांतून भेट देत असतात.
विक्रमगड ग्रामपंचायती अंतर्गत याच बंधाऱ्यातून विक्रमगड शहर यशवंतनगर, वाकडुचापाडा, टोपलेपाडा, संगमनगर आदी भागांत नळाद्वारे पाण्याचा पुरवठा केला जातो. या बंधाऱ्यास बाराही महिने पाणी असल्याने कधीही विक्रमगडकरांना पाणीटंचाई भासत नाही.
आजपर्यंत या बंधाऱ्यामुळे पाण्याची मुबलक सुविधा उपलब्ध आहे. या बांधाऱ्यावर पाण्यात डुंबण्याचा आनंद लुटण्यासाठी वर्षभर गर्दी असते. येथील छोटा चौकोनी आकाराचा हौदासारखा भाग खोलगट नाही, त्यामुळे यामध्ये उतरून अंघोळ करण्याची मजा काही औरच आहे.
