पावसाळ्याचा सुगंध हवेत दरवळायला लागला की, आपण छत्र्या, रेनकोटसारख्या गोष्टींची तयारी सुरू करतो. पण या ऋतूमध्ये एक अशी गोष्ट आहे जी कुणालाही नकोशी वाटते आणि ती म्हणजे डासांचा त्रास. मोकळी निचरा न झालेली पाणी साठलेली जागा, दमट वातावरण आणि भरपूर आर्द्रता डासांच्या वाढीसाठी पोषक ठरते.
परिणामी डेंग्यू, मलेरिया आणि चिकनगुनियासारख्या आजारांची भीतीही वाढते. पण एक चांगली गोष्ट अशी आहे की, बाजारात मिळणाऱ्या केमिकल युक्त उत्पादनांवर अवलंबून राहण्याची गरज नाही,कारण निसर्गातच त्यावर उत्तम उपाय आहे.
तुमचं घर जर खरंच डासमुक्त आणि ताजं ठेवायचं असेल, तर काही नैसर्गिक वनस्पती तुमच्या मदतीला धावून येऊ शकतात. या झाडांमध्ये असा वास किंवा रसायन असतं जे डासांना सहन होत नाही आणि त्यामुळे ते तुमच्या घराजवळही फिरकत नाहीत.
रोझमेरी
उदाहरण द्यायचं झालं तर रोझमेरी ही अशी वनस्पती आहे जी केवळ डासांना दूर ठेवत नाही, तर घरात एक आल्हाददायक सुगंध पसरवते. ती थोड्या सूर्यप्रकाशातही वाढते आणि खिडकीजवळ किंवा बाल्कनीत ठेवली तर अधिक प्रभावी ठरते. त्याचप्रमाणे कॅटनिप हे एक रोप आहे जे मांजरींसाठी आकर्षण असलं तरी डासांसाठी अजिबात सहनशील नाही. घरात पाण्याने भरलेल्या भांड्यातदेखील हे झाड रोप सहज वाढतं.
सिट्रोनेला
सिट्रोनेला हे रोप विशेषतः डास प्रतिबंधासाठी प्रसिद्ध आहे. तिच्या पानांतून निघणाऱ्या विशिष्ट वासामुळे डास दूर पळतात. उन्हाळ्यात या रोपाला येणारी गुलाबी-जांभळी फुलं घराचं सौंदर्यही वाढवतात. निलगिरीसुद्धा अशाच झाडांपैकी एक, तिचा वास वातावरणात आर्द्रता कमी करतो आणि डासांना जवळ येऊ देत नाही.
पुदीना
आपल्या स्वयंपाकघरात कायम असणारं पुदीनाही यामध्येच येतं. याचा ताजा वास डासांना आणि मुंग्यांनाही दूर ठेवतो. पुदिन्याचं रोप लावल्यास केवळ तुम्हाला स्वयंपाकासाठी ताजी पानं मिळणार नाहीत, तर त्याचा सुगंधही घर स्वच्छ आणि डासमुक्त ठेवतो.
या वनस्पती फक्त डासांना दूर ठेवत नाहीत, तर तुमच्या घरात सौंदर्य, ताजेपणा आणि आरोग्यदायक वातावरण निर्माण करतात. कोणत्याही साईड इफेक्टशिवाय, केवळ निसर्गाच्या मदतीने डेंग्यू, मलेरिया आणि इतर रोगांपासून संरक्षण मिळवायचं असेल, तर आजच ही रोपं लावायला सुरुवात करा.
