पैसे गुंतवायचे म्हणजे कुठे आणि कसे हे ठरवताना आपल्या मनात अनेक शंका निर्माण होतात. “Equity की Debt?” हा प्रश्न आज अनेक गुंतवणूकदारांच्या मनात घर करून बसला आहे. विशेषतः म्युच्युअल फंड हा आजच्या काळात लोकप्रिय पर्याय बनला असला, तरी त्यामध्येही योग्य फंड निवडणं हे महत्त्वाचं काम आहे. प्रत्येकजण आपल्या गुंतवणुकीवर जास्तीत जास्त परतावा मिळावा अशी अपेक्षा ठेवतो, पण त्यासाठी योग्य ठिकाणी आणि योग्य प्रकारे पैसे गुंतवणं गरजेचं आहे.
इक्विटी म्युच्युअल फंड
गुंतवणुकीचा उद्देश जर दीर्घकालीन असेल आणि तुम्ही थोडी जोखीम घेण्यास तयार असाल, तर इक्विटी म्युच्युअल फंड हे उत्तम पर्याय ठरू शकतात. या फंडांमध्ये कंपन्यांच्या शेअर्समध्ये गुंतवणूक केली जाते. चांगल्या कामगिरी करणाऱ्या कंपन्यांमुळे तुमच्या गुंतवणुकीचे मूल्य लक्षणीय वाढू शकते. दीर्घकाळासाठी अशा फंडांमध्ये पैसे गुंतवले असता 20 ते 30 टक्क्यांपर्यंत परतावा मिळाल्याची उदाहरणं अनेक आहेत. मात्र, इक्विटी फंड हे बाजाराशी जोडलेले असतात. त्यामुळे बाजारातील चढउतारांचा थेट परिणाम तुमच्या गुंतवणुकीवर होतो. फायदा मिळण्याइतकीच नुकसान होण्याचीही शक्यता असते.
Debt म्युच्युअल फंड
दुसरीकडे, जर तुम्हाला स्थिरता हवी असेल आणि जोखीम कमी असावी असं वाटत असेल, तर Debt म्युच्युअल फंड हे तुलनेत अधिक सुरक्षित पर्याय मानले जातात. यामध्ये बँका, सरकारी संस्था किंवा कंपन्यांकडून निश्चित व्याजदराने दिले जाणारे बॉण्ड, डिबेंचर किंवा फिक्स्ड डिपॉझिटसारखी साधनं असतात.
परंतु याचा अर्थ असा नाही की तुम्हाला हमखास मोठा परतावा मिळेल. हे फंड जरी सुरक्षित असले, तरी यामधून मिळणारा परतावा हा तुलनेने कमीच असतो आणि अनेक वेळा तो महागाई दरापेक्षा खाली असतो. म्हणजेच, दीर्घकालीन गुंतवणुकीत तुमच्या पैशाचं मूळ मूल्य घसरण्याची शक्यता असते.
हायब्रिड फंड
आता बोलूया हायब्रिड फंडांबद्दल. हे फंड एकप्रकारे समतोल राखण्याचा प्रयत्न करतात. कारण यात काही रक्कम इक्विटीमध्ये आणि काही डेटमध्ये गुंतवली जाते. त्यामुळे जोखीम कमी होते आणि परतावा मिळवण्याची संधीही टिकून राहते. हे फंड त्यांच्या नावाप्रमाणेच दोन भिन्न प्रकारच्या मार्केटचा फायदा मिळवण्याचा प्रयत्न करतात. हायब्रिड फंड हे विशेषतः अशा गुंतवणूकदारांसाठी योग्य असतात जे पूर्णपणे जोखीम घ्यायला तयार नाहीत, पण खात्रीशीर परताव्यापलीकडेही पाहू इच्छितात.
शेवटी, हे लक्षात ठेवा की कोणता फंड तुमच्यासाठी योग्य आहे हे ठरवताना तुमच्या आर्थिक गरजा, उद्दिष्टं, आणि जोखीम घेण्याची मानसिकता याचा विचार करणं आवश्यक आहे. प्रत्येक व्यक्तीची परिस्थिती वेगळी असते. म्हणून कुणी काय केलं यापेक्षा तुम्हाला काय हवंय हे महत्त्वाचं. मोठा परतावा हवा असेल, तर थोडी जोखीम स्वीकारावी लागेल. आणि जर तुमचं ध्येय फक्त सुरक्षिततेचं असेल, तर स्थिरता देणाऱ्या डेट फंडांना प्राधान्य द्या.
