आजच्या बदलत्या जगात, पालक म्हणून प्रत्येकाची एकच चिंता असते आपल्या मुलीचं सुरक्षित आणि उज्ज्वल भविष्य. शिक्षण, लग्न, आणि जीवनातली इतर महत्त्वाच्या टप्प्यांची आर्थिक तयारी आधीच झाली पाहिजे, ही भावना सगळ्याच पालकांच्या मनात असते. आणि अशा वेळी केंद्र सरकारची ‘सुकन्या समृद्धी योजना’ हे केवळ एक गुंतवणुकीचं साधन नसून, आपल्या मुलीच्या स्वप्नांना मूर्त रूप देण्याचा आधार ठरू शकतो.
आजच्या काळात आर्थिक स्थैर्य मिळवणं सोपं नाही. पण जर आपण योग्य वेळी, योग्य ठिकाणी गुंतवणूक केली, तर भविष्यात आपल्याला त्याचा मोठा फायदा होऊ शकतो. सुकन्या समृद्धी योजना ही अशीच योजना आहे जिथं दरवर्षी 1,00,000 रुपये गुंतवणूक केली, तर 15 वर्षांनी तब्बल 34 लाख रुपयांचा परतावा मिळू शकतो. हो, फक्त व्याजातूनच सुमारे 19 लाख रुपये मिळण्याची शक्यता असते. ही आकडेवारी वाचताना सुरुवातीला विश्वास बसणार नाही, पण ही योजना मजबूत आणि सरकारी असल्याने तिच्यावर विश्वास ठेवायला हरकत नाही.
‘सुकन्या समृद्धी योजना’
या योजनेत मिळणारा 8.2% व्याजदर सध्या बाजारातील इतर अनेक सुरक्षित योजनांपेक्षा अधिक आहे. यामुळे आपल्या पैशांची वाढ देखील झपाट्याने होते. शिवाय, ही योजना केवळ परताव्यापुरती मर्यादित नाही. यामध्ये कर सवलतीचाही समावेश आहे. आयकर कायद्यानुसार, 1.5 लाख रुपयांपर्यंतची गुंतवणूक कर सवलतीस पात्र ठरते आणि त्यावर मिळणाऱ्या व्याजावरही कोणताही कर लागत नाही. त्यामुळे ही योजना दुहेरी फायद्याची ठरते.
सुकन्या समृद्धी योजनेचं आणखी एक वैशिष्ट्य म्हणजे ती फक्त मुलींसाठी आहे. मुलीच्या जन्मापासून 10 वर्षांपर्यंत तिच्या नावाने हे खाते उघडता येतं. एका कुटुंबात दोन मुलींसाठी अशी खाती उघडता येतात, आणि जर जुळे किंवा तीन मुली असतील, तर त्यासाठी विशेष सवलतीही आहेत. या खात्यात दरवर्षी किमान 250 रुपये आणि कमाल 1.5 लाख रुपये गुंतवता येतात. गुंतवणूक कालावधी 15 वर्षांचा असून, संपूर्ण मॅच्युरिटी रक्कम 21 वर्षांनंतर मिळते.
परतावा किती मिळेल?
या योजनेची गणितं अजिबात क्लिष्ट नाहीत. उदाहरण द्यायचं झालं, तर समजा तुम्ही दरवर्षी 1,00,000 रुपये या योजनेत गुंतवले. 15 वर्षांत तुमची एकूण गुंतवणूक 15 लाख रुपये झाली. मात्र 8.2% वार्षिक व्याजदराच्या आधारे, मॅच्युरिटीला तुम्हाला मिळणारी एकूण रक्कम सुमारे 34,19,191 रुपये होईल. म्हणजेच, फक्त व्याजातून तुम्हाला मिळणारा लाभ आहे 19,19,191 रुपये.
या योजनेत गुंतवणूक करणे म्हणजे केवळ पैसा वाढवण्याचं साधन नाही, तर मुलीच्या भविष्यासाठी घेतलेलं एक सजग आणि जबाबदारीचं पाऊल आहे. शिक्षण असो की लग्न, या योजनेतून मिळणारी रक्कम तिच्या आयुष्यातल्या महत्त्वाच्या क्षणांना एक आधार देऊ शकते.
