GK Quiz : आशियातील सिंगापूर हा एकमेव असा देश आहे की जो एकाच वेळी संपूर्ण देशही आहे आणि एक शहरही आहे. अवघे 735.7 चौ.कि.मी. क्षेत्रफळ, नैसर्गिक संसाधनांचा अभाव आणि लोकसंख्येचा मर्यादित आकार असूनही सिंगापूरने जगातील सर्वात समृद्ध आणि कार्यक्षम अर्थव्यवस्थांपैकी एक म्हणून स्वतःची ओळख निर्माण केली आहे. खरेदी क्षमतेनुसार (PPP) प्रति व्यक्ती उत्पन्नात सिंगापूर जगात नंबर 1 मानला जातो.
2025 च्या अंदाजानुसार सिंगापूरचा GDP per capita (PPP) सुमारे 1.56 ते 1.61 लाख आंतरराष्ट्रीय डॉलर इतका आहे. भारतीय चलनात पाहता हे वार्षिक 1.43 ते 1.47 कोटी रुपयांच्या आसपास जाते. याचा अर्थ सिंगापूरमधील नागरिकांची खरेदी क्षमता जगातील बहुतेक देशांपेक्षा जास्त आहे.
नॉमिनल GDP per capita बाबतीतही सिंगापूर आघाडीवर असून 2025 मध्ये हा आकडा सुमारे 94 हजार डॉलर आहे. त्यामुळे स्वित्झर्लंड, नॉर्वे, आयर्लंडसारख्या देशांच्या पंक्तीत सिंगापूरचे नाव घेतले जाते.
आकाराने छोटा असला तरी सिंगापूरची एकूण अर्थव्यवस्था मोठी आहे. 2025 मध्ये सिंगापूरचा नॉमिनल GDP सुमारे 574 अब्ज डॉलर इतका आहे. जगातील सर्वात व्यस्त बंदरांपैकी एक असलेला सिंगापूर पोर्ट, जागतिक व्यापार आणि लॉजिस्टिक्सचा महत्त्वाचा केंद्रबिंदू ठरतो. यामुळे व्यापार आणि सेवाक्षेत्रातून देशाला मोठ्या प्रमाणावर उत्पन्न मिळते.
सिंगापूरची ओळख ‘Fine City’ अशीही आहे. कडक कायदे, स्वच्छता, कमी भ्रष्टाचार आणि सुरक्षित वातावरण यामुळे देशात शिस्तीची संस्कृती निर्माण झाली आहे.
कॉर्पोरेट टॅक्स फक्त 17% आणि वैयक्तिक उत्पन्नावर कमाल 22% कर असल्याने परदेशी गुंतवणूकदार मोठ्या प्रमाणावर येथे येतात. Ease of Doing Business मध्येही सिंगापूर अनेक वर्षे अव्वल क्रमांकावर राहिला आहे.
इंग्रजी, मलय, मंदारिन आणि तमिळ या चार अधिकृत भाषा, विविध संस्कृतींचे सहअस्तित्व, उत्कृष्ट आरोग्यसेवा, दीर्घायुष्य आणि वेगवान इंटरनेट या सर्व गोष्टी सिंगापूरला आधुनिक आणि प्रगत देश बनवतात.
9 ऑगस्ट 1965 रोजी स्वतंत्र झालेल्या सिंगापूरने अवघ्या काही दशकांत जगाला हे सिद्ध करून दाखवले आहे की समृद्धीसाठी देशाचा आकार नव्हे, तर दूरदृष्टी, शिस्त आणि स्मार्ट धोरणे महत्त्वाची असतात.
