Soybean Rate : जिल्ह्यातील कृषी उत्पन्न बाजार समितीत सध्या सोयाबीनच्या दरात झालेल्या भरीव वाढीमुळे बाजारपेठेत नवचैतन्य निर्माण झाले आहे. गेल्या काही आठवड्यांपासून दबावाखाली असलेले दर अचानक सुधारल्याने शेतकरी, व्यापारी आणि अडत्यांमध्ये व्यवहारांची गती वाढली आहे.
सध्या बाजार समितीत दररोज सरासरी १५ ते १८ हजार क्विंटल सोयाबीनची आवक होत असून, प्रतिक्विंटल सुमारे ५,९०० रुपये इतका दर मिळत आहे. हा दर शासकीय हमीभावापेक्षा सुमारे ५०० रुपयांनी अधिक असल्याने शेतकरी वर्गाला मोठा दिलासा मिळाल्याचे चित्र आहे.
दरवाढीमुळे शेतकऱ्यांचा कल हमीभाव खरेदी केंद्रांऐवजी थेट खुल्या बाजाराकडे वळताना दिसत आहे. खुल्या बाजारात जास्त दर मिळत असल्याने तसेच व्यवहार रोखीने होत असल्यामुळे अनेक शेतकरी थेट बाजार समितीतच विक्रीस प्राधान्य देत आहेत.
काही शेतकऱ्यांनी आधीच हमीभाव खरेदी केंद्रांवर नोंदणी केली असली, तरी प्रत्यक्ष विक्री मात्र बाजार समितीत होत आहे. यामुळे शेतकऱ्यांच्या हातात तात्काळ पैसे येत असून, कर्जफेड आणि दैनंदिन खर्चासाठी त्यांना दिलासा मिळत आहे.
मात्र या दरवाढीचा लाभ सर्व शेतकऱ्यांना समान प्रमाणात मिळालेला नाही. काढणीनंतर अनेक शेतकऱ्यांनी कमी दराच्या काळातच सोयाबीनची विक्री केली होती. त्या वेळी त्यांना प्रतिक्विंटल अवघे ३,००० ते ३,२०० रुपये दर मिळाला.
यंदा अवकाळी पावसामुळे सोयाबीन भिजल्याने उत्पादनावर परिणाम झाला आणि मिळालेला दर उत्पादन खर्चही भरून काढू शकला नाही. आता जवळपास ८० टक्के सोयाबीनची विक्री पूर्ण झाल्यानंतर दर वाढल्याने, या वाढीचा लाभ नेमका कोणाला मिळतोय, असा सवाल शेतकरी वर्गातून उपस्थित होत आहे.
दुसरीकडे, कमी दरात सोयाबीन खरेदी करून साठवणूक केलेल्या व्यापाऱ्यांसाठी सध्याची दरवाढ फायदेशीर ठरत आहे. वाढलेल्या मागणीमुळे बाजारात व्यवहारांचा वेग वाढला असून, अडत बाजारात गर्दी आणि लगबग दिसून येत आहे.
आगामी काळात आवक आणि मागणी स्थिर राहिल्यास दर टिकून राहण्याची शक्यता व्यक्त केली जात असून, सध्या तरी सोयाबीनच्या दरवाढीमुळे लातूर बाजार समितीत सकारात्मक वातावरण निर्माण झाले आहे.
