Laws Of Property:- जर आपण देशातील विविध कोर्टामध्ये असलेले प्रलंबित प्रकरणे जर बघितले तर यामध्ये सर्वात जास्त प्रकरणे हे प्रॉपर्टीशी संबंधित असल्याचे दिसून येते. यामध्ये भावा भावांमधील वाद तसेच भावा बहिणींमधील वाद किंवा आई-वडील किंवा मुलांमधील वाद प्रामुख्याने दिसून येतात.
कधी कधी तर वाद इतके टोकाला जातात की, एकमेकांच्या जीव घेण्यापर्यंत मजल जाते. प्रॉपर्टी वाटपाच्या संदर्भामध्ये भारतामध्ये निश्चित असे कायदे असून बरेच जण मात्र अजूनही या कायद्याबद्दल अनभिज्ञ असल्याने प्रॉपर्टीच्या वादात नको त्या गोष्टी घडतात.
यामध्ये जर बघितले तर महिलांच्या नावावर किंवा ज्या प्रॉपर्टीच्या मालक महिला आहेत त्यांच्या प्रॉपर्टी वाटपा संबंधात किंवा एखाद्या महिलेचा मृत्यूनंतर तिच्या मालमत्ते वर नेमका पहिला अधिकार कोणाचा असतो? या मुद्द्यावर देखील अनेक वाद आपल्याला दिसून येतात.
परंतु हिंदू उत्तर अधिकार कायद्यातील जर आपण महिलांसाठी असलेल्या तरतुदी पाहिल्या तर यामध्ये अलीकडील कालावधीत बऱ्याच सुधारणा करण्यात आलेल्या असून यासंबंधी प्रॉपर्टी वाटपाच्या बाबतीत काही गोष्टी स्पष्ट करण्यात आलेले आहे.
हिंदू महिलेच्या प्रॉपर्टीचे विभाजन किंवा वाटप कसे होते?
जर आपण हिंदू उत्तराधिकार कायदा बघितला तर त्या कायद्याच्या कलम 15(1) मध्ये महिलेच्या मालकीच्या मालमत्तेचे विभाजन कशा पद्धतीने केले जाईल? याबद्दल माहिती दिली आहे. या कलमांतर्गत जर बघितले तर महिलेच्या नावाची म्हणजेच महिलेच्या मालकीच्या प्रॉपर्टीच्या विभाजनासाठी पसंतीचा क्रम देण्यात आलेला आहे. सोप्या भाषेत सांगायचे म्हणजे महिलेच्या मालकीच्या प्रॉपर्टी विभाजनाच्या मध्ये पसंतीच्या पहिल्या क्रमांकात महिलेचा मुलगा आणि मुलगी यांना स्थान देण्यात आलेले आहे.दुसरे स्थान हे पतीच्या वारसाचे आहे.इतकेच नाही तर संबंधित महिलेचे आई आणि वडिलांना देखील महिलेच्या संपत्तीवर हक्क असतो व पसंती क्रमामध्ये त्यांना तिसऱ्या क्रमांकाचे स्थान देण्यात आलेले आहे. यामध्ये महिलेच्या वडिलांच्या वारसाचे स्थान चौथ्या क्रमांकावर आहे तर पाचव्या स्थानी आईच्या वारसांचा समावेश आहे.
महिला जर अविवाहित असेल तर कशा पद्धतीने होते प्रॉपर्टीचे विभाजन?
यामध्ये भारतीय उत्तराधिकारी कायदा 1925 चे कलम 42 आणि 43 नुसार बघितले तर एखादी स्त्री अविवाहित आहे व तिचा कुठल्याही प्रकारचे मृत्युपत्र न करता मृत्यू झाला आणि त्या महिलेचे वडील जिवंत असतील तर वडिलांना संपत्तीचा वारसा मिळतो किंवा वडिलांचा मृत्यू झाला असेल तर त्या अविवाहित महिलेची मालमत्ता आई आणि भावंडांमध्ये समान प्रमाणात विभागली जाते.
