Krushi Yojana:- शेतकऱ्यांचे उत्पन्न दुप्पट व्हावे या दृष्टिकोनातून शेतीला प्रोत्साहित करण्याकरिता राज्य सरकारच्या अनेक योजना आहेत. शेती क्षेत्राकरिता आवश्यक असलेल्या पायाभूत सुविधा उभ्या करण्याकरिता शेतकऱ्यांना आर्थिक स्वरूपात मदत व्हावी म्हणून या योजनांचा खूप मोठा आधार शेतकऱ्यांना मिळतो.
कृषी योजनांमध्ये फळबागा पासून ते सिंचन तसेच हरितगृह व शेडनेट सारख्या संरक्षित शेती तंत्रज्ञानाच्या योजना या खूप महत्त्वपूर्ण अशा योजना असून या माध्यमातून अनुदान स्वरूपात शेतकऱ्यांना मदत करण्यात येते. या अशा कृषी विभागामार्फत राबवल्या जाणाऱ्या आणि शेतकऱ्यांसाठी महत्त्वाच्या असलेल्या या योजनांबद्दल एक महत्त्वाचा शासन निर्णय निर्गमित करण्यात आला असून त्याचीच माहिती आपण या लेखात बघणार आहोत.
छत्रपती शिवाजी महाराज कृषी योजनेतून मिळेल आता शेतकऱ्यांना विविध योजनांचा लाभ
याबद्दल सविस्तर वृत्त असे की, महाराष्ट्र शासनाच्या कृषी विभागाच्या माध्यमातून मागेल त्याला फळबाग, मागेल त्याला शेततळे तसेच शेततळ्याचे अस्तरीकरण, ठिबक आणि तुषार सिंचन, शेडनेट व हरितगृह आणि आधुनिक पेरणी यंत्र, कॉटन श्रेडर देणे योजनेला आता छत्रपती शिवाजी महाराज कृषी योजना असे नाव देण्यात येणार असून त्याबद्दलचा शासन निर्णय देखील निर्गमित करण्यात आला.
सन 2023-24 या आर्थिक वर्षामध्ये मागेल त्याला शेततळे योजनेचा विस्तार करण्यात आलेला असून त्यानुसार आता मागेल त्याला फळबाग, मागेल त्याला ठिबक व तुषार सिंचना तसेच शेततळे, शेततळ्याचे अस्तरीकरण , हरितगृह तसेच शेडनेट, पेरणी यंत्रे आणि कॉटन श्रेडर देण्याबाबत आता मागेल त्याला शेततळे या योजनेच्या विस्तारित योजनेला मान्यता देण्यात आलेली असून या विस्तारित योजनेला छत्रपती शिवाजी महाराजांच्या राज्याभिषेक सोहळ्याच्या 350 व्या वर्षपूर्तीनिमित्त हे नाव देण्यात आलेले आहे.
शेतकऱ्यांना यामध्ये जे काही घटक किंवा बाबीची आवश्यकता आहे ती त्यांनी मागणी केल्यावर ताबडतोब उपलब्ध करून दिले तर शेतकऱ्यांना याचा खूप मोठा फायदा होऊ शकतो. त्यामुळे अर्थमंत्र्यांनी सन 2023-24 च्या अर्थसंकल्पीय भाषणामध्ये जी काही घोषणा केली होती त्यानुसार आता मागेल त्याला शेततळे योजनेचा विस्तार करण्यात येऊन मागेल त्याला फळबाग, ठिबक व तुषार सिंचन तसेच शेततळे व शेततळ्याचे अस्तरीकरण, आधुनिक पेरणी यंत्र आणि कॉटन श्रेडर, शेडनेट आणि हरितगृह देण्याबाबत शासन परिपत्रकानुसार आता मान्यता देण्यात आली आहे.
विस्तारित योजनेला छत्रपती शिवाजी महाराज कृषी योजना असे नाव देण्याची जी काही बाब होती ती शासनाच्या विचाराधीन होती व त्यानुसार शासन निर्णयाच्या माध्यमातून छत्रपती शिवाजी महाराज कृषी योजना असे या विस्तारित योजनेला नाव देण्यात येत आहे.
यामध्ये लक्षात घेण्याची बाब म्हणजे या शासन निर्णयाच्या माध्यमातून मूळ असलेल्या योजनेला फक्त छत्रपती शिवाजी महाराज कृषी योजना असे नाव देण्यात आले आहे. परंतु यामुळे सदर योजनेच्या अंमलबजावणीच्या अनुषंगाने जे काही मार्गदर्शक सूचना आहेत त्या प्रचलित शासन निर्णयाप्रमाणेच लागू राहतील हे देखील लक्षात घेणे गरजेचे आहे.
