Mutual Fund Scheme:- भारतीय म्युच्युअल फंड उद्योगांमध्ये गेल्या दहा वर्षात अभूतपूर्व वाढ झाल्याचे दिसून येत आहे.डिसेंबर २०१४ मध्ये एकूण मालमत्ता व्यवस्थापनाखाली (AUM) १०.५१ लाख कोटी रुपये होता आणि २०२४ च्या डिसेंबर पर्यंत तो वाढून ६६.९३ लाख कोटी रुपयांपर्यंत पोहोचला.या वाढीचे मुख्य कारण म्हणजे भारतीय गुंतवणूकदारांमध्ये म्युच्युअल फंडांविषयीचा विश्वास वाढला आहे. यामध्ये इक्विटी फंडांचा मोठा वाटा आहे. मोतीलाल ओसवाल अ‍ॅसेट मॅनेजमेंट कंपनीच्या अहवालानुसार AUM मध्ये इक्विटी फंडांचा भाग ६०.१९% होता. ज्यामुळे ते सर्वात प्रमुख गुंतवणूक पर्याय बनले आहेत. याच्या तुलनेत डेट फंडांचा वाटा २६.७७%, हायब्रिड फंडांचा ८.५८% आणि इतर गुंतवणूक पर्यायांचा ४.४५% होता.
गुंतवणूकदारांमध्ये इक्विटी फंड पसंतीचे
गुंतवणूकदारांची पसंती सक्रिय इक्विटी फंडांना अधिक दिसून आली. ज्यामुळे या फंडांमध्ये १०५ हजार कोटी रुपयांचा निव्वळ प्रवाह नोंदवला गेला. तसेच फ्लेक्सी कॅप आणि मिड कॅप फंडांनीही गुंतवणूकदारांचे लक्ष वेधून घेतले.कारण या फंडांमध्ये प्रत्येकाने १५ हजार कोटी रुपयांचा गुंतवणूक प्रवाह मिळवला. पॅसिव्ह इक्विटी फंडांमध्येही मोठा कल पाहायला मिळाला आणि त्यामध्ये एकूण २९ हजार कोटी रुपयांची गुंतवणूक करण्यात आली.
वर्तमान काळात गुंतवणूकदारांच्या पसंतीत बदल होत असून ते अधिक व्यापक-आधारित फंडांकडे वळत आहेत. सक्रिय ब्रॉड-बेस्ड फंडांचा वाटा ५७% वरून ७०% पर्यंत वाढला आहे.जे दाखवते की गुंतवणूकदार अधिक विविधतापूर्ण फंडांकडे आकर्षित होऊ लागले आहेत. त्याच वेळी, थीमॅटिक फंडांमध्ये घट झाली आहे, ज्यामध्ये निव्वळ प्रवाह १७ हजार कोटी रुपयांवरून १४ हजार कोटी रुपयांवर गेला. डेट फंडांमध्ये, कॉन्स्टंट मॅच्युरिटी फंड्सने ३७ हजार कोटी रुपयांचा निव्वळ प्रवाह नोंदवला.तर लिक्विड फंडांमध्ये १५ हजार कोटी रुपये जमा झाले. हायब्रिड फंडांमध्ये मल्टी अ‍ॅसेट फंड्सने उत्कृष्ट कामगिरी केली आणि ४८% निव्वळ गुंतवणूक मिळवली. तर बॅलन्स्ड अॅडव्हान्टेज फंड्सने २५% योगदान दिले.
आंतरराष्ट्रीय फंडामध्ये गुंतवणूक झाली कमी
तसेच आंतरराष्ट्रीय फंडांमध्ये गुंतवणूक कमी झाली आहे. कारण आरबीआयच्या नियमांनी या क्षेत्रातील गुंतवणुकीला काही मर्यादा घातल्या आहेत. या क्षेत्रात सक्रिय आणि निष्क्रिय व्यापक-आधारित निधींमध्ये ०.१ हजार कोटी रुपयांचा निव्वळ प्रवाह दिसून आला. म्युच्युअल फंड उद्योगाच्या जलद वाढीचे मुख्य कारण भारतीय अर्थव्यवस्थेची वाढती क्षमता आणि आर्थिक साक्षरता आहे असे मोतीलाल ओसवाल एएमसीचे एमडी आणि सीईओ प्रतीक अग्रवाल म्हणाले. आगामी काळात तंत्रज्ञान, नवोन्मेष आणि उत्कृष्ट गुंतवणूक उपाय उद्योगाच्या आणखी वाढीस हातभार लागतील.
गुंतवणूकदारांनी काय करावे?
गुंतवणूक करताना या उद्योगाच्या संभाव्य वाढीची महत्त्वाची भूमिका असली तरी कोणत्याही प्रकारच्या म्युच्युअल फंड गुंतवणुकीसाठी तज्ञांचा सल्ला घेणं आवश्यक आहे. अशा सल्ल्यामुळे गुंतवणूकदार योग्य निर्णय घेऊ शकतात आणि त्यांना कमीत कमी जोखमीचा सामना करावा लागू शकतो.
