अहमदनगर Live24 टीम, 5 जून 2021 :- श्रीगोंदा तालुक्यातील मांडवगण येथील निंबोडीवाडी येथे कांदे भरण्यासाठी शेतात गेलेल्या शेतकऱ्याच्या भरदिवसा घरात घुसून घरातील पावणे दोन लाखांचे सोन्याचे दागिने अज्ञात चोरट्यांनी लांबवले.
बाळासाहेब लक्ष्मण शेटे असे त्या शेतकऱ्याचे नाव आहे. या बाबत श्रीगोंदा पोलिसात गुन्हा दाखल केला आहे. दरम्यान सध्याच्या स्थितीत एकीकडे कोरोना अन दुसरीकडे चोरट्यांचा धुमाकूळ या दोन्ही संकटात सर्वसामान्य जनता भरडली जात आहे.
याबाबत अधिक माहिती अशी कि, तालुक्यातील मांडवगण येथील बाळासाहेब लक्ष्मण शेटे हे निंबोडीवाडी येथे शेतात कांदे भरण्यासाठी गेले होते. काम आटोपून ते दुपारी अडीचच्या सुमारास शेतातून परत आले.
यावेळी त्यांना घराचे कुलूप तोडले असल्याचे लक्षात आले नंतर त्यांनी घरात प्रवेश करताच घरातील सर्व साहित्याची उचकपाचक करून अस्ताव्यस्त टाकले होते. त्यामुळे त्यांनी कपाटात ठेवलेले सोन्या-चांदीचे दागिने पाहिले असता ते चोरी झाल्याचे लक्षात आले.
याबाबत त्यांनी श्रीगोंदा पोलिसांना माहिती देताच पोलिस तातडीने श्वानपथकासह घटनास्थळी हजार होत आजूबाजूला शोध घेतला. या प्रकरणी शेटे यांनी दिलेल्या फिर्यादीवरून श्रीगोंदा पोलिसांनि अज्ञात चोरट्याविरुद्ध गुन्हा दाखल केला आहे.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
