कर्जत- माथेरानच्या पर्यटनाला चालना देणाऱ्या व्हॅली क्रॉसिंग या साहसी खेळाला पुन्हा परवानगी मिळावी, अशी मागणी स्थानिकांनी लावून धरली आहे. या व्यवसायावर अवलंबून असलेल्या ६५ कुटुंबांनी थेट मुख्यमंत्री देवेंद्र फडणवीस यांची भेट घेऊन निवेदन सादर केले आहे. माथेरानमध्ये पर्यटन हाच प्रमुख व्यवसाय असल्याने व्हॅली क्रॉसिंग बंद झाल्यापासून अनेक कुटुंबांवर उपासमारीची वेळ आली आहे.
वनविभागाकडून बंदी
माथेरानमध्ये जंगलातील डोंगर आणि तलावाच्या दोन किनाऱ्यांना जोडणारी झिप लाइन अर्थात व्हॅली क्रॉसिंग पर्यटकांमध्ये प्रचंड लोकप्रिय होती. जुलै २०२१ मध्ये राज्य मंत्रिमंडळाने पर्यटन वाढीसाठी साहसी खेळांना मान्यता दिली होती, आणि माथेरानमधील व्हॅली क्रॉसिंग हा त्याचाच एक भाग होता. मात्र, काही काळापूर्वी वनविभागाने अनियंत्रित आणि परवानगीविना सुरू असलेल्या या खेळांवर बंदी घातली. यामुळे अनेक राजकीय गट आणि स्थानिकांमध्ये वाद निर्माण झाले, आणि हा व्यवसाय पूर्णपणे ठप्प झाला.
राजकीय हालचालींना वेग
या मागणीसाठी राजकीय हालचालींनाही वेग आला आहे. भाजपने केंद्रीय पर्यावरण मंत्री भूपेंद्र यादव यांची भेट घेतली, तर यापूर्वी आमदार प्रशांत ठाकूर यांनी मुख्यमंत्र्यांशी चर्चा केली. शिवसेनेचे शहरप्रमुख चंद्रकांत चौधरी यांनी खालापूरचे आमदार महेंद्र थोरवे यांच्यासोबत चर्चा करून सकारात्मक आश्वासन मिळवल्याचा दावा केला आहे. मात्र, सोशल मीडियावर याबाबत श्रेयवादाचा वाद उफाळला आहे. हा खेळ कोणाच्याही मक्तेदारीचा नसावा, आणि रीतसर परवानगीने तो कायमस्वरूपी सुरू व्हावा, अशी मागणी नागरिक करत आहेत.
माथेरानच्या पर्यटनाला नवी दिशा मिळणार
माथेरानमधील लुईजा पॉइंट ते एको पॉइंट जोडणारी झिप लाइन पर्यटकांची सर्वाधिक आवडती आहे. तसेच, एको पॉइंट ते हनिमून पॉइंट हा ट्रेकही पर्यटकांना भुरळ घालतो. शॉलॅट लेकच्या एका किनाऱ्यावरून दुसऱ्या किनाऱ्यावर जाणारी झिप लाइन पाण्यावरील चित्तथरारक अनुभव देते. याशिवाय, अलेक्झांडर पॉइंट, रामबाग पॉइंट, लिटिल चौक पॉइंट आणि खंडाळा पॉइंट यांसारख्या ठिकाणी साहसी खेळांचा थरार पर्यटकांना अनुभवता येतो. हे खेळ पुन्हा सुरू झाल्यास माथेरानच्या पर्यटनाला नवे बळ मिळेल, अशी अपेक्षा आहे.
६५ कुटुंबांचे मुख्यमंत्र्यांना निवेदन
व्हॅली क्रॉसिंगमुळे स्थानिकांना रोजगार मिळवण्यासाठी आणि पर्यटनाला चालना देण्यासाठी माथेरानमधील व्हॅली क्रॉसिंगला पुन्हा परवानगी मिळावी, यासाठी ६५ कुटुंबांनी मुख्यमंत्र्यांना निवेदन दिले आहे. माथेरानमध्ये पर्यटन हा प्रमुख व्यवसाय असल्याने व्हॅली क्रॉसिंग बंद झाल्याने अनेक कुटुंबांवर उपासमारीची वेळ आली आहे.
