IPO News : सिक्युरिटीज अँड एक्सचेंज बोर्ड ऑफ इंडिया (SEBI) ने तब्बल १२ कंपन्यांच्या आयपीओला मान्यता दिल्याने शेअर बाजारात गुंतवणूक करणाऱ्या गुंतवणूकदारांसाठी आनंदाची बातमी समोर आली आहे. येत्या काही दिवसांत या कंपन्या भांडवली बाजारात दाखल होणार असून, यामुळे गुंतवणूकदारांना नव्या गुंतवणूक संधी उपलब्ध होणार आहेत.
सेबीकडून मंजुरी मिळालेल्या कंपन्यांमध्ये हेला इन्फ्रा (इन्फ्रा. मार्केटची मूळ कंपनी), पर्पल स्टाईल लॅब्स, जय जगदंबा, यूकेबी इलेक्ट्रॉनिक्स, सीएमआर ग्रीन टेक्नॉलॉजी, ट्रान्सलाइन टेक्नॉलॉजीज, मेडिकॅप हेल्थकेअर, ओसवाल केबल्स, बीव्हीजी इंडिया, साई पॅरेंटरल आणि सिफी इन्फिनिट स्पेसेस यांचा समावेश आहे.
या सर्व कंपन्यांनी जून ते ऑक्टोबर या कालावधीत सेबीकडे त्यांची आयपीओ कागदपत्रे सादर केली होती. आवश्यक तपासणी आणि प्रक्रियेनंतर सेबीने या आयपीओंना मंजुरी दिली आहे. आता या कंपन्या त्यांच्या सार्वजनिक विक्री प्रक्रियेला सुरुवात करू शकतात.
टायगर ग्लोबलच्या सहकार्याने चालणाऱ्या इन्फ्रा. मार्केटची मूळ कंपनी असलेल्या हेला इन्फ्राने ४,५०० ते ५,५०० कोटी रुपयांच्या आयपीओचा प्रस्ताव मांडला आहे. या आयपीओमध्ये नवीन शेअर्सचा इश्यू तसेच विद्यमान भागधारकांकडून विक्रीसाठी ऑफर (OFS) यांचा समावेश असणार आहे.
दुसरीकडे, आयटी क्षेत्रातील सिफी टेक्नॉलॉजीजची उपकंपनी सिफी इन्फिनिट स्पेसेस २,५०० कोटी रुपयांचे नवीन शेअर्स आणि १,२०० कोटी रुपयांची ऑफर फॉर सेल जारी करण्याची योजना आखत आहे.
लक्झरी फॅशन क्षेत्रात कार्यरत असलेली पर्पल स्टाईल लॅब्स ही कंपनी पर्निया पॉप-अप शॉपच्या माध्यमातून आपला व्यवसाय चालवते. ही कंपनी केवळ नवीन शेअर इश्यूद्वारे सुमारे ६६० कोटी रुपये उभारण्याच्या तयारीत आहे. तसेच, नोएडा-आधारित इलेक्ट्रॉनिक्स उत्पादक कंपनी यूकेबी इलेक्ट्रॉनिक्स ४०० कोटी रुपयांचा नवीन इश्यू लाँच करणार आहे.
याशिवाय इतर कंपन्याही त्यांच्या आयपीओद्वारे नवीन भांडवल उभारण्याबरोबरच विद्यमान भागधारकांना हिस्सा विक्रीची संधी देणार आहेत. एकूणच, सेबीच्या या मंजुरीमुळे प्राथमिक बाजारात उत्साहाचे वातावरण निर्माण झाले असून, येणारा काळ आयपीओ गुंतवणूकदारांसाठी महत्त्वाचा ठरणार आहे.
