Share Market : अमेरिकेचे माजी राष्ट्राध्यक्ष डोनाल्ड ट्रंप यांच्या टॅरिफविषयक धमक्या आणि आक्रमक परराष्ट्र धोरणामुळे आधीच जागतिक बाजारात अस्थिरता दिसत असताना, अमेरिकेतून आलेल्या आणखी एका महत्त्वाच्या बातमीने भारतीय शेअर बाजारात खळबळ उडवली आहे.
विशेषतः अडानी समूहाच्या शेअर्सना याचा मोठा फटका बसला असून शुक्रवार, 23 जानेवारी रोजी समूहातील जवळपास सर्वच शेअर्समध्ये मोठ्या प्रमाणावर विक्री झाली.
ब्लूमबर्गच्या वृत्तानुसार, अमेरिकेचा बाजार नियामक सिक्युरिटीज अँड एक्सचेंज कमिशन (SEC) अडानी समूहाचे अध्यक्ष गौतम अडानी आणि त्यांचे भाचे सागर अडानी यांच्याविरोधात कायदेशीर कारवाई करण्यासाठी न्यायालयाची परवानगी मागत आहे. या प्रकरणी न्यूयॉर्कमधील ब्रुकलिन येथे अमेरिकन जिल्हा न्यायाधीश निकोलस गारौफिस यांच्यासमोर अर्ज सादर करण्यात आला आहे.
SEC ने न्यायालयाला सांगितले आहे की, पारंपरिक मार्गाने कायदेशीर नोटीस देण्याचे अनेक प्रयत्न निष्फळ ठरले. त्यामुळे आता ई-मेल तसेच अमेरिकेत असलेल्या अडानींच्या वकिलांमार्फत नोटीस पाठवण्याची परवानगी मागण्यात आली आहे. याशिवाय, भारत सरकारकडेही गेल्या 14 महिन्यांत दोन वेळा मदत मागितली होती; मात्र त्याला प्रतिसाद मिळालेला नाही, असेही SEC ने स्पष्ट केले.
या घडामोडींचा थेट परिणाम गुंतवणूकदारांच्या भावनांवर झाला. अडानी ग्रीन एनर्जीचा शेअर सर्वाधिक 7.7 टक्क्यांनी घसरत 835 रुपयांच्या इंट्राडे नीचांकी पातळीवर पोहोचला. अडानी एंटरप्रायझेस आणि अडानी एनर्जी सोल्युशन्समध्ये प्रत्येकी सुमारे 5.7 टक्क्यांची घसरण झाली.
अडानी पोर्ट्स 4.5 टक्के, अडानी टोटल गॅस 4.1 टक्के, तर अडानी पॉवर सुमारे 3 टक्क्यांनी खाली आला. सिमेंट क्षेत्रातील अंबुजा सिमेंट्स आणि ACC या शेअर्सवरही दबाव दिसून आला.
हा संपूर्ण वाद 20 नोव्हेंबर 2024 रोजी समोर आलेल्या आरोपांशी संबंधित आहे. 2020 ते 2024 या कालावधीत सोलर प्रकल्पांचे कंत्राट मिळवण्यासाठी 250 दशलक्ष डॉलरपेक्षा अधिक रकमेची लाच दिल्याचा आरोप आहे.
या प्रकरणात अमेरिकेचा न्याय विभाग फौजदारी चौकशी करत असून, SEC कडून सिव्हिल खटला दाखल करण्यात आला आहे. या पार्श्वभूमीवर अडानी समूहासमोरील अडचणी वाढण्याची शक्यता असून, बाजारात अनिश्चिततेचे वातावरण निर्माण झाले आहे.
