Petrol and Diesel Use
Petrol and Diesel Use : देशाच्या काही भागांमध्ये कमकुवत मागणी आणि औद्योगिक व्यवहार मंदावल्यामुळे सप्टेंबरमध्ये डिझेलच्या विक्रीत तीन टक्क्यांनी घट झाली आहे. सार्वजनिक क्षेत्रातील पेट्रोलियम कंपन्यांच्या प्राथमिक आकडेवारीवरून ही माहिती मिळाली आहे.
सार्वजनिक क्षेत्रातील तिन्ही पेट्रोलियम कंपन्यांच्या डिझेल विक्रीत सप्टेंबरमध्ये घट झाली आहे. मात्र, पेट्रोलची विक्री वाढली आहे.
देशातील सर्वाधिक वापरल्या जाणाऱ्या इंधनाच्या डिझेलची विक्री सप्टेंबरमध्ये घटून ५८.१ लाख टन झाली आहे, जी मागील वर्षी याच कालावधीत ५९.९ लाख टन होती. सप्टेंबरच्या पहिल्या पंधरवड्यात डिझेलच्या मागणीत पाच टक्क्यांहून अधिक घट झाली, तर कमी पावसामुळे दुसऱ्या पंधरवड्यात डिझेलची मागणी वाढली. डिझेलची विक्री मासिक आधारावर अडीच टक्क्यांनी वाढली आहे.
ऑगस्टमध्ये डिझेलची विक्री ५६.७ लाख टन होती. साधारणपणे, पावसाळ्यात डिझेलची विक्री कमी होते, कारण पावसामुळे कृषी क्षेत्राची मागणी कमी राहते. डिझेलचा वापर कृषी क्षेत्रात सिंचन, कापणी आणि वाहतुकीसाठी इंधन म्हणून केला जातो. एप्रिल आणि मे महिन्यात डिझेलचा वापर अनुक्रमे ६.७ टक्के आणि ९.३ टक्क्यांनी वाढला, कारण त्यावेळी कृषी क्षेत्राची मागणी चांगली होती.
याशिवाय उन्हाळ्यामुळे गाड्यांमध्ये एअर कंडिशनरचा वापर वाढला होता. आकडेवारीनुसार, गेल्या वर्षीच्या याच कालावधीच्या तुलनेत सप्टेंबरमध्ये पेट्रोलची विक्री ५.४ टक्क्यांनी वाढून २८ लाख टन झाली आहे. ऑगस्टमध्ये पेट्रोलच्या मागणीतील वाढ जवळपास स्थिर राहिली आहे. सप्टेंबरमध्ये मासिक आधारावर पेट्रोलची मागणी ५.६ टक्क्यांनी वाढली.
उद्योगातील सूत्रांचे म्हणणे आहे की स्थिर आणि निरोगी आर्थिक घडामोडी आणि हवाई प्रवासातील सुधारणांमुळे वर्षाच्या उर्वरित महिन्यांत देशातील तेलाची मागणी जास्त राहील. सप्टेंबरमध्ये पेट्रोलचा वापर कोविड- प्रभावित सप्टेंबर २०२१ पेक्षा १९.३ टक्के जास्त होता आणि महामारीपूर्वीच्या कालावधीच्या म्हणजेच सप्टेंबर २०१९ पेक्षा ३० टक्के जास्त होता. डिझेलचा वापर सप्टेंबर २०२१ च्या तुलनेत १९ टक्क्यांनी जास्त आणि सप्टेंबर २०१९ च्या तुलनेत १२.५ टक्क्यांनी जास्त आहे.
एलपीजीची मागणी वाढली
विमानतळांवर प्रवाशांच्या संख्येत सातत्याने वाढ होत असताना, सप्टेंबरमध्ये विमान इंधन एटीएफची मागणी ७.५ टक्क्यांनी वाढून ५,९६,५०० टन झाली. सप्टेंबर २०२१ च्या तुलनेत ते ५५.२ टक्के अधिक होते. तर प्री-कोविड म्हणजेच सप्टेंबर २०१९ च्या तुलनेत ते ३.५५ टक्के कमी होते.
मासिक आधारावर जेट इंधनाची मागणी सप्टेंबरमध्ये स्थिर राहिली. ऑगस्ट २०२३ मध्ये विमान इंधनाची मागणी ५,९९,१०० टन होती. स्वयंपाकाच्या गॅसची (एलपीजी) विक्री सप्टेंबरमध्ये वार्षिक आधारावर सहा टक्क्यांनी वाढून २६.७ लाख टनांवर पोहोचली आहे.
एलपीजीचा वापर सप्टेंबर, २०२१ च्या तुलनेत ११.४ टक्के जास्त होता आणि प्री-कोविड कालावधी म्हणजेच सप्टेंबर २०१९ च्या तुलनेत २३.३ टक्के जास्त होता. एलपीजीची मागणी मासिक आधारावर ७.३ टक्क्यांनी वाढली आहे. ऑगस्टमध्ये एलपीजीची मागणी २४.९ लाख टन होती ..