Chandrakant Patil : कसबा विधानसभा मतदार संघाचे नवनिर्वाचित आमदार रवींद्र धंगेकर यांनी आज राष्ट्रवादी काँग्रेसचे अध्यक्ष शरद पवार यांची भेट घेतली. यावेळी पवारांनी माध्यमांशी संवाद साधला. त्यावेळी त्यांनी चंद्रकांत पाटील यांच्यावर टीका केली. यामुळे याची चर्चा सध्या सुरू आहे.
यावेळी पवार बोलत असताना त्यांनी शहाण्या माणसाबद्दल विचारा, असे सांगत शरद पवार यांनी पत्रकारांचा प्रश्न उडवून लावतानाच चंद्रकांत पाटील यांच्याबाबत बोलणार नसल्याचे स्पष्ट केले. यामुळे आता पाटील काय बोलणार याकडे सर्वांचे लक्ष लागले आहे.
दरम्यान, कसबा पोटनिवडणुकीत पैशाचा वारेमाप वापर झाला. लोकांनी मला भ्रमणध्वनीवर नोटांची छायाचित्रे दाखवली, ते सामान्य कार्यकर्ते होते. भाजपच्या पारंपारिक मतदारालाही ते आवडले नाही. असे असताना मात्र भाजपचे नेते हे कबूल करत नाहीत, असे पवार यांनी सांगितले.
विजयाची खात्री नव्हती मात्र धंगेकर टू व्हीलरवर फिरतात, त्यांना मोठी गाडी लागत नाही. तसेच लगेच कामे करण्यासाठी तत्पर असतात, असेही शरद पवार यांनी सांगितले. कसब्याची निवडणूक हिंदुत्वाच्या मुद्द्यावर नेण्याचा भाजपचा प्रयत्न होता.
असे असताना मात्र निवडणूक हिंदुत्वावर गेली की, नाही हे माहीत नाही. महाविकास आघाडीचे सर्व नेते, पदाधिकारी काम करत होते. त्याचा हा परिणाम आहे, असे शरद पवार यांनी सांगितले. येणाऱ्या निवडणुकीत देखील बदल दिसतील असेही शरद पवार यांनी सांगितले आहे.