अहिल्यानगर जिल्ह्यात महाराष्ट्र नवनिर्माण सेनेचे किती उमेदवार निवडणुकीच्या रिंगणात आहेत ? मनसेच्या संपूर्ण उमेदवारांची यादी पहा

Ahilyanagar News : काल महाराष्ट्रातील विधानसभा निवडणुकीसाठी सुरू असणारा प्रचार थांबलाय. उद्या 20 नोव्हेंबरला राज्यात मतदान होणार आहे. मतदान झाल्यानंतर अवघ्या तीन दिवसांनी म्हणजेच 23 नोव्हेंबरला मतमोजणीची प्रक्रिया पूर्ण होईल. यंदाच्या विधानसभा निवडणुकीत महाराष्ट्र नवनिर्माण सेनेने देखील राज्यातील अनेक मतदारसंघांमध्ये आपले उमेदवार उतरवलेले आहेत.

महाराष्ट्रात यंदा महाराष्ट्र नवनिर्माण सेनेने आपले 128 उमेदवार निवडणुकीच्या रिंगणात उतरवले आहेत. मनसे यावेळी स्वबळावर विधानसभा निवडणूक लढवत असून 128 जागांवर पक्षाने उमेदवार उतरवले असल्याने मनसेचे किती उमेदवार यंदाच्या निवडणुकीत विजयाचा गुलाल उधळणार याकडे साऱ्यांचे लक्ष लागून आहे.

अहिल्या नगर जिल्ह्यातही महाराष्ट्र नवनिर्माण सेनेचे उमेदवार निवडणुकीच्या रिंगणात आहेत. अहिल्यानगर जिल्ह्यात एकूण 12 विधानसभा मतदारसंघ असून यापैकी सात विधानसभा मतदारसंघात महाराष्ट्र नवनिर्माण सेनेने आपला भिडू मैदानात उतरवलाय. यामुळे नगर जिल्ह्यातील अनेक मतदारसंघात यंदा चुरस निर्माण झाली आहे.

राज साहेबांचे महाराष्ट्र सैनिक नगर जिल्ह्यातील आपल्या उमेदवारांच्या प्रचारार्थ गेल्या काही दिवसांपासून मेहनत घेत होते. दरम्यान आज आपण महाराष्ट्र नवनिर्माण सेनेकडून अहिल्यानगर जिल्ह्यातील कोणकोणत्या मतदारसंघात आपले उमेदवार उतरवण्यात आले आहेत याबाबत थोडक्यात माहिती जाणून घेण्याचा प्रयत्न करणार आहोत.

अहिल्या नगर जिल्ह्यात नगर शहर मधून सचिन डफळ, राहुरी मधून ज्ञानेश्वर गाडे उर्फ माऊली, संगमनेर मधून योगेश सूर्यवंशी, श्रीगोंदा विधानसभा मतदारसंघातून संजय शेळके, कर्जत जामखेड विधानसभा मतदारसंघातून रवींद्र कोठारी, श्रीरामपूर विधानसभा मतदारसंघातून राजू कापसे आणि पारनेर विधानसभा मतदारसंघातून अविनाश पवार हे मनसे कडून निवडणुकीच्या रिंगणात आहेत.