Ajit pawar : राष्ट्रवादी काँग्रेसचे नेते आणि विरोधी पक्षनेते अजित पवार यांचेही होर्डिंग्ज मुंबईत झळकले आहेत. यावरील मजकूर वाचून एकच चर्चा सुरू झाली आहे. या होर्डिंगवर महाराष्ट्राचे भावी मुख्यमंत्री म्हणून अजित पवार यांचा उल्लेख करण्यात आला आहे. त्यामुळे राष्ट्रवादी काँग्रेसमध्ये मुख्यमंत्री पदासाठी रस्सीखेच सुरु झाली असल्याचे दिसून येत आहे.
असे असताना आता यावर उपमुख्यमंत्री देवेंद्र फडणवीस यांनी प्रतिक्रिया दिली आहे. ते म्हणाले, भावी म्हटलंय ना. कधीतरी त्यांचं राज्य येईल. येऊ शकत कधीतरी ते येऊ शकत, येईल तेव्हा ठरवतील कोण मुख्यमंत्री हे, त्याची लढाई आतापासूनच का? अशी प्रतिक्रिया फडणवीस यांनी दिली.
दरम्यान, काही दिवसांपूर्वी राष्ट्रवादी काँग्रेसचे नेते प्रदेशाध्यक्ष जयंत पाटील यांचे देखील पोस्टर अशाच प्रकारे लावण्यात आले होते. दरम्यान, महाराष्ट्राचे भावी मुख्यमंत्री, एकच दादा, एकच वादा, अजित दादा, अशा आशयाचा मजकूर या होर्डिंगवर लिहिलेला आहे. यामुळे याचे फोटो व्हायरल होत आहेत.
तेव्हा पक्षाचे अध्यक्ष शरद पवार यांना विचारले देखील होते, ते म्हणाले की अजित पवारांना मुख्यमंत्री म्हणून बघायला आवडेल. मात्र सध्या आमच्याकडे त्यासाठीचे संख्याबळ नाही. असे म्हणत त्यांनी या विषयावर बोलणे टाळले होते. काही दिवसांपूर्वी जयंत पाटील यांच्य वाढदिवसानिमित्त त्यांचे काही पोस्टर्स मुंबईत झळकले होते.
दरम्यान, पुण्यातील पोट निवडणुकीची रणधुमाळी सुरू आहे. यासाठी अजित पवार आणि भाजपचे अनेक मंत्री पुण्यात तळ ठोकून आहेत. सभा, रॅली, बैठका यामुळे पुण्यातील वातावरण ढवळून निघाले आहे. सर्वच पक्षांनी आपली राजकीय ताकद पणाला लावली आहे.