Raj thackeray : सध्या पुण्यात कसबा आणि पिंपरी चिंचवडमध्ये निवडणूकीचे वारे वाहू लागले आहे. अशातच मनसे अध्यक्ष राज ठाकरे उद्यापासून २ दिवसीय पुणे दौऱ्यावर येणार आहेत. या दरम्यान राज ठाकरे शहर कार्यकारणीमधील नेत्यांची बैठक घेणार आहेत.
तसेच कसबा पोटनिवडणुकीत मनसे देखील मैदानात उतरणार असून सोमवारी कसबा पोटनिवडणुकीसाठी नावे जाहीर करणार आहे. यामुळे आता याकडे सर्वांचे लक्ष लागले आहे. राज ठाकरे शहर कार्यकारणीने तयार केलेल्या इच्छुकांची यादी बघून निर्णय घेणार आहेत.
सध्या कसब्यााठी मनसेकडून अजय शिंदे, गणेश भोकरे, गणेश सातपुते, आशिष देवधर, निलेश हांडे, प्रल्हाद गवळी, बाळा शेडगे आदींची नावे चर्चेत आहे. यामुळे कोणाची वर्णी लागणार हे बघणे महत्त्वाचे ठरणार आहे. भाजपकडून सध्या उमेदवारांची नावे जाहीर करण्यात आली आहेत.
यामध्ये कसबा विधानसभा पोटनिवडणुकीसाठी हेमंत रासने तर चिंचवड विधानसभा पोटनिवडणुकीसाठी अश्विनी जगताप यांना भाजपकडून उमेदवारी जाहीर झाली आहे. तसेच महाविकास आघाडीची नावे आज जाहीर होणार आहेत.
दरम्यान, पुण्यातील कसबा आणि पिंपरीतील चिंचवड विधानसभा मतदारसंघातून पोटनिवडणुकीचे वातावरण मागील काही दिवसांपासून चांगलेच तापले आहे. आम आदमी देखील याठिकाणी निवडणूक लढवणार आहे. यामुळे रंगत वाढली आहे.