Ethanol Production
Ethanol Production : देशांतर्गत वापरासाठी साखरेची पुरेशी उपलब्धता राखण्यासाठी त्याचबरोबर किमती नियंत्रणात ठेवण्याच्या दृष्टिकोनातून या महिन्यात सुरू झालेल्या २०२३- २४ च्या पुरवठा वर्षासाठी उसाचा रस आणि साखरेच्या पिकापासून इथेनॉलचे उत्पादन करण्यासाठी केंद्र सरकारने बंदी घातली आहे.
याबाबतची अधिसूचना गुरुवारी काढण्यात आली. परंतु सरकारने २०२३-२४ मध्ये इथेनॉल उत्पादनासाठी ‘बी-मोलासेस’ वापरण्यास परवानगी दिली आहे. २०२३-२४ विपणन वर्षात (ऑक्टोबर-सप्टेंबर) साखर उत्पादनात अंदाजे घट झाल्याच्या पार्श्वभूमीवर मंत्रालयाने हा निर्णय घेतला आहे.
अन्न मंत्रालयाने सर्व साखर कारखान्यांना आणि डिस्टिलर्सना पाठवलेल्या पत्रात २०२३-२४ या इथेनॉल पुरवठा वर्षात (डिसेंबर-नोव्हेंबर) इथेनॉल उत्पादनासाठी उसाचा रस / साखर सिरप वापरू नये, असे निर्देश दिले आहेत.
साखर (नियंत्रण) आदेश १९६६ च्या कलम ४ आणि ५ नुसार हे निर्देश देण्यात आले आहेत. तथापि, बी मोलॅसेसचे उत्पादन तेल विपणन कंपन्यांकडून प्राप्त झालेल्या विद्यमान ऑर्डरचा पुरवठा करणे सुरू राहील, असे पत्रात म्हटले आहे.
इंडियन शुगर मिल्स असोसिएशन या साखर उद्योगाचे नेतृत्व करणाऱ्या संस्थेने २०२३-२४ विपणन वर्षापासून (ऑक्टोबर-सप्टेंबर) सुरू होणाऱ्या साखर उत्पादनात ९ टक्क्यांनी घसरण होऊन ३३७ लाख टन साखर उत्पादन राहण्याचा अंदाज व्यक्त केला आहे.
इथेनॉल उत्पादनासाठी साखरेच्या वळवण्याचा अंदाज यात व्यक्त केलेला नाही. भारताने २०२२-२३ विपणन वर्षात ६१ लाख टन साखर निर्यात केली, जी मागील वर्षी ११२ लाख टन होती. या पणन वर्षासाठी सरकारने अद्याप निर्यातीला परवानगी दिलेली नाही.