Pension Plan Tips:- आयुष्यभर नोकरी किंवा व्यवसाय करून आपण संपूर्ण आयुष्यभर पैसे कमावत असतो. परंतु अशाप्रकारे नोकरी किंवा व्यवसायातून पैसे कमावत असताना मात्र उतारवयामध्ये आर्थिक घडी विस्कटू नये किंवा पैशासाठी आपल्याला कोणावर अवलंबून राहण्याची गरज उद्भवू नये याकरिता बरेच व्यक्ती हे वेगवेगळ्या अशा पेन्शन योजनांमध्ये गुंतवणूक करतात.
निवृत्तीनंतर पेन्शन हेच एक उत्पन्नाचे साधन असते व त्यांच्या रूपाने मिळणारे हे उत्पन्न कधीच थांबू नये याकरिता व्यवस्थित प्लॅनिंग करून एखाद्या चांगल्या सेवानिवृत्ती म्हणजेच पेन्शन योजनेत गुंतवणूक करणे देखील गरजेचे असते. सध्या अनेक सेवानिवृत्ती योजना असून यामध्ये प्रामुख्याने अटल पेन्शन योजना आणि राष्ट्रीय निवृत्तीवेतन प्रणाली अर्थात एनपीएस या योजनांचे नाव प्रकर्षाने पुढे येते.
पेन्शन स्वरूपात चांगला पैसा मिळावा याकरिता या दोन्ही योजना खूप फायद्याचे आहेत. या दोन्ही योजनांच्या माध्यमातून गुंतवणूकदारांना निवृत्तीनंतर पेन्शनचा फायदा मिळतो. परंतु या दोन्ही योजनांचा तुलनात्मक दृष्ट्या विचार केला तर त्या संपूर्णपणे वेगळे आहेत. त्यामुळे अशा परिस्थितीत या दोन्ही योजनांपैकी कोणती योजना तुमच्यासाठी फायद्याची ठरेल हे तुम्हाला माहिती असणे किंवा तुम्हाला कळणे गरजेचे आहे.
पेन्शन प्लानसाठी कोणती योजना राहील फायद्याची?
1- राष्ट्रीय पेन्शन प्रणाली अर्थात एनपीएस– नॅशनल पेन्शन सिस्टम अर्थात राष्ट्रीय पेन्शन प्रणाली ही भारत सरकारने 2004 मध्ये सुरू केलेली योजना आहे. या योजनेमध्ये गुंतवणूकदाराला एक ठराविक रक्कम गुंतवणूक गरजेचे असते. या योजनेचा लाभ फक्त भारतीयांनाच घेता येऊ शकतो व ज्यांचे वय 18 ते 55 वर्षाच्या दरम्यान असणे गरजेचे असते.
राष्ट्रीय पेन्शन प्रणाली योजना ही पेन्शन फंड नियामक आणि विकास प्राधिकरण यांच्या माध्यमातून चालवली जाते किंवा नियंत्रित केली जाते. या योजनेमध्ये संबंधित गुंतवणूकदाराला सेवानिवृत्ती खात्यामध्ये गुंतवणूक करावी लागते. इतकेच नाही तर गुंतवणूकदार या योजनेमध्ये स्टॉक, सरकारी रोखे इत्यादींच्या आधारे देखील गुंतवणूक करतात.
या योजनेचे आणखी एक महत्त्वाचे वैशिष्ट्य म्हणजे ही योजना शेअर मार्केटची जोडलेली आहे. म्हणजेच गुंतवणूकदाराने जी गुंतवलेली रक्कम असते त्या गुंतवणुकीच्या कामगिरीच्या आधारावरच गुंतवणूकदाराला नफा मिळत असतो. जर आपण ठळक वैशिष्ट्य पाहिली तर ही योजना बाजाराशी जोडलेली योजना आहे.
तसेच ही योजना तीन मालमत्ता वर्गामध्ये दिली जाते व यामध्ये इक्विटी, सरकारी रोखे आणि कार्पोरेट बॉण्डचा समावेश होतो. यामध्ये तुम्ही किती गुंतवणूक करू शकता यावर कुठल्याही प्रकारची कमाल मर्यादा नाही.
या माध्यमातून मिळणारी पेन्शन ही गुंतवणूकदाराने गुंतवलेली रक्कम म्हणजेच योगदान आणि गुंतवणुकीचा परतावा यावर अवलंबून असते. शासनाचे कोणतेही योगदान या योजनेत नसते. तसेच या योजनेत नॉमिनी असणे बंधनकारक आहे.
2- अटल पेन्शन योजना– सरकारच्या माध्यमातून पेन्शन कार्यक्रमाच्या अंतर्गत अटल पेन्शन योजनेची सुरुवात करण्यात आलेली असून ही योजना 2015 मध्ये सुरू करण्यात आलेले होती. या योजनेचे वैशिष्ट्य म्हणजे यामध्ये भारतीय नागरिकांसोबतच अनिवासी भारतीय देखील गुंतवणूक करू शकतात. या योजनेच्या माध्यमातून पेन्शनची हमी म्हणजेच हमी पेन्शनचा फायदा मिळतो.
या योजनेतून मिळणारी पेन्शन ही संबंधित गुंतवणूकदार कोणत्या वयामध्ये गुंतवणूक करायला सुरुवात करत आहे व किती गुंतवणूक करत आहे यावरून अवलंबून असते. जवळपास 18 ते 40 वर्षे वयोगटातील गुंतवणूकदार या योजनेत गुंतवणूक करू शकतात व कमीत कमी वीस वर्षे गुंतवणूक करणे गरजेचे असते. या योजनेमध्ये सेवानिवृत्तीनंतर हमी निवृत्ती वेतनाचा लाभ मिळतो.
जर आपण गुंतवणुकीची रक्कम पाहिली तर यामध्ये तुम्हाला प्रत्येक महिन्याला जास्तीत जास्त पाच हजार रुपये गुंतवता येऊ शकतात. या योजनेच्या माध्यमातून तुम्हाला एक हजार रुपयांपासून ते पाच हजार रुपयांपर्यंत मासिक पेन्शन दिली जाते.
यामध्ये मात्र गुंतवणूकदाराला पर्मनंट रिटायरमेंट अकाउंट नंबर दिला जात नाही. यामध्ये सरकारच्या ज्या काही अटी व शर्ती आहेत त्यानुसार पेन्शन धारकाला ठराविक रक्कम मिळत असते.या योजनेत देखील नॉमिनीचे नाव बंधनकारक आहे.
