Accident
नगर-छत्रपती संभाजीनगर रोडवरील नेवासा फाट्याजवळ भीषण अपघात झाला. भरधाव वेगातील कार पुलाचे कठडे तोडून ओढ्यात कोसळली. दुर्दैवाने ५ जणांचा ओढ्यात पाण्यात बुडून मृत्यू झाला.
मृतांमध्ये आळेफाटा येथील तिघे व छत्रपती संभाजीनगरमधील दोघांचा समावेश आहे. हा भीषण अपघात रविवारी (दि. २९) रात्री ११ वाजण्याच्या सुमारास घडला. सुदैवाने या अपघातात १३ वर्षीय मुलगी सुखरुप बचावली.
वसिम हारुण मुल्ला (वय ४१), अनसुरा बेगम हारुण मुल्ला (वय ४१, दोघे रा. मोमीनपुरा, छत्रपती संभाजीनगर) , रेश्मा मोमीन हलदार (वय ३५), हसिना बेगम हरुण पठाण (वय ५४) व सामिया मोमीन हलदार (वय १४, तिघे रा. आळेफाटा, ता. जुन्नर) असे अपघातात मृत्युमुखी पावलेल्या इसमांची नावे आहेत. मासुमा मोमीन हलदार वय १३) ही मुलगी या अपघातात बचावली आहे.
या अपघाताची माहिती अशी की, पुणे जिल्ह्यातील जुन्नर तालुक्यातील आळेफाटा येथील एकाच कुटुंबातील नातेवाईक छत्रपती संभाजीनगरकडे जात होते. नेवासा फाट्याजवळील त्रिमूर्ती शैक्षणिक संकुलाजवळ कारवरील (क्र. एमएच १२, इंटी २७००) चालकाचे नियंत्रण सुटल्याने अपघात झाला.
भरधाव वेगातील कार पुलाचे कठडे तोडून रस्त्यालगत असलेल्या ओढ्यात कोसळली. रात्रीची वेळ असल्यामुळे अपघातस्थळी मदतकार्य वेळेवर न मिळाल्याने कारमधील प्रवाशांचा पाण्यात बुडून दुर्दैवी मृत्यू झाला. नशीब बलवत्तर होते म्हणून मासुमा हलदार ही मुलगी अपघातातून बालंबाल वाचली.
दरम्यान, अपघातातील मृत्यूमुखी पावलेल्या इसमांवर नेवासा फाटा येथील ग्रामीण रुग्णालयात शवविच्छेदन आले. सोमवारी (दि. ३०) सकाळी मृतदेह नातेवाईकांच्या ताब्यात देण्यात आले. नेवासा पोलिस ठाण्याचे पोनि. शिवाजी डोईफोडे यांच्या मार्गदर्शनाखाली पोलिस उपनिरीक्षक शैलेंद्र ससाणे व त्यांच्या टिमने घटनास्थळी भेट देवून पाहणी केली.
नेवासा पोलिस पथकाप्रमाणेच स्थानिक नागरिकांनीही बचाव कार्यांसाठी मदत केली. अपघात प्रकरणी हरुण अमीर मुल्ला (वय ४३, रा. छत्रपती संभाजीनगर) यांनी फिर्याद दाखल केली.
फिर्यादीनुसार नेवासा पोलिस ठाण्यात अपघाताच्या गुन्ह्याची नोंद करण्यात आली आहे. दरम्यान, अपघाताचे वृत्त जुन्नर, आळेफाटा तसेच संभाजीनगर येथे धडकताच मुल्ला व हलदार कुटूंबियांनी घटनास्थळी धाव घेतली.एकाच कुटूंबातील ५ इसम मृत्यूमुखी पावल्याने कुटूंबावर शोककळा पसरली असून, सर्वत्र हळहळ व्यक्त होत आहे.