अहमदनगर Live24 टीम, 29 ऑक्टोबर 2021 :- जिल्हाभरात मानवी वस्तीत बिबट्यांचा वावर वाढला असून वन्यप्राणी व मानव यांच्यात संघर्ष वाढत आहे.
राहुरी तालुक्यातील गडाख वस्ती येथे मोटारसायकलवर ड्रमने पाणी घेऊन घरी निघालेल्या तरूणावर घासात दबा धरून बसलेल्या बिबट्याने झडप घातली,
पण मोटारसायकल खाली पडून झालेल्या आवाजाने बिबट्या माघारी फिरल्याचे या भागातील नागरिकांनी दिव्य मराठीशी बोलताना सांगितले. राहुरी तालुक्यातील वांबोरीत गडाख वस्ती भागातील रस्त्यांवर पथदिवे नसल्याने अंधार आहे.
मागील काही दिवसांपासून गडाख वस्ती भागात बिबट्याचा वावर असल्याची चर्चा आहे. यापूर्वी कुत्रे, शेळ्या, कोंबड्या फस्त केल्याच्या घटना घडल्या आहेत.
परंतु, माणसावर हल्ला करण्याची ही पहिलीच घटना समोर आल्याने या परिसरात बिबट्याची दहशत पसरली आहे. बुधवारी सायंकाळी साडेसातच्या सुमारास विकास संभाजी गडाख (रा. गडाख वस्ती कुक्कडवेढे रोड वांबोरी) ड्रममध्ये पाणी घेऊन त्यांच्या घरी जात होते.
गाडीची गती कमी असतानाच, घासाच्या शेतात दबा धरून बसलेल्या बिबट्याने विकासवर हल्ला चढवला. बिबट्याचा जोरदार धक्का गाडीला लटकवलेल्या ड्रमला लागून गाडी पडली.
गाडी पडताना झालेला जोरदार आवाज व विकासने आराडाओरड केल्यानंतर, बिबट्या गुरगुरतच माघारी फिरला. त्यामुळे मोठा अनर्थ टळला. या घटनेत विकास गडाख यांना कोणतीही मोठी दुखापत झाली नाही.
याबाबत गडाख कुटुंबियांनी वनविभागाला कळवल्यानंतर, वन अधिकाऱ्यांनी पिंजरा तुम्हीच घेऊन या, आमचा माणूस ठिकाण दाखवील तेथे पिंजरा लावा, असा सल्ला दिला. या अजब सल्ल्यामुळे नागरिकांमध्ये तिव्र नाराजी व्यक्त होत आहे.