नगर शहरातून शिवसेना-भाजपा युतीची उमेदवारी माजी आमदार अनिल राठोड यांना पुन्हा मिळाली आहे. उद्या ते अर्ज दाखल करणार आहेत. या पार्श्‍वभूमीवर शिवसेनेच्या शिष्टमंडळाने माजी खासदार दिलीप गांधी यांच्या निवासस्थानी भेट घेवून चर्चा केली.
भाजप व सेना एकत्रित लढत असल्यामुळे आता सर्वांचीची मोट सेनेला बांधावी लागणार आहे. मागील काही काळात राठोड व गांधी यांच्यात सुरू असलेला संघर्ष लक्षात घेता ही मनधरणी सुरु झाली आहे. एकदा दोनदा नव्हे तर तब्बल तीन वेळा गांधींवर आगपाखड करणारे राठोड समर्थक गांधी यांच्या घरी जावून आले आहेत. पण अद्याप त्यात यश आले नसल्याचे समजते.
लोकसभेच्या निवडणुकीदरम्यान दिलीप गांधी यांच्या नावाला राठोड यांनी जाहीर विरोध दर्शविला होता.त्यामुळे गांधी व राठोड यांच्यातील वाद आणखीच चिघळला. गांधी यांनीही राठोड सेनेचे उमेदवार असतील तर आम्हाला गृहीत धरू नका असा इशारा दिला होता.मागील आठवड्यात राठोड यांनी आले तर त्यांच्यासह व न आल्यास त्यांच्याशिवाय असे सूतोवाच पत्रकार परिषदेत केले होते. मात्र आता राठोड यांना उमेदवारी मिळार्लयाने त्यांच्या समर्थकांनी गांधी यांची मनधरणी सुरु केली आहे.