कोपरगाव येथे भरधाव स्कॉर्पिओ गाडी हॉटेलमध्ये घुसून मोठा अपघात घडला आहे. या घटनेत सुनंदा साबळे या महिलेचा जागीच मृत्यू झाला असून तिघे जण गंभीर जखमी झाले आहेत. मुंबई-नागपूर महामार्गावर संत जनार्दन स्वामी हॉस्पिटलजवळ हा अपघात झाला. अपघातानंतर परिसरात मोठी खळबळ उडाली असून, प्रत्यक्षदर्शींच्या माहितीनुसार चालक मद्यधुंद अवस्थेत होता.
दुपारी बारा वाजण्याच्या सुमारास मुंबई-नागपूर महामार्गावर भरधाव वेगात असलेली स्कॉर्पिओ गाडी अचानक एका दुचाकीला धडक देत हॉटेल व जनरल स्टोअर्समध्ये घुसली. चालकाचे नियंत्रण सुटल्याने हा अपघात झाला.
गाडी स्टॉलमध्ये घुसताच मोठा आवाज झाला, त्यामुळे परिसरातील लोकांनी घटनास्थळी धाव घेतली. या अपघातात ५६ वर्षीय सुनंदा साबळे यांचा मृत्यू झाला, तर सुदाम काशिनाथ साबळे आणि अलका वसंत साबळे गंभीर जखमी झाले.
अपघाताचा संपूर्ण प्रकार हॉटेल व दुकानातील सीसीटीव्ही कॅमेऱ्यात कैद झाला आहे. यामध्ये स्कॉर्पिओ चालकाने प्रथम एका दुचाकीला धडक दिली आणि त्यानंतर गाडी थेट हॉटेलमध्ये घुसल्याचे स्पष्ट दिसत आहे. या अपघातामुळे हॉटेल चालक आकाश विलास गोंदकर यांचे मोठे नुकसान झाले आहे. प्रत्यक्षदर्शींच्या म्हणण्यानुसार चालक मद्यधुंद अवस्थेत होता आणि त्यामुळेच त्याचे नियंत्रण सुटले.
घटनास्थळी नागरिक मोठ्या संख्येने जमले होते, तसेच पोलिसांनी घटनास्थळी धाव घेतली. मात्र, सायंकाळी उशिरापर्यंत कोपरगाव शहर पोलिस ठाण्यात गुन्हा दाखल करण्यात आला नव्हता. सीसीटीव्ही फुटेजच्या आधारे पोलिस आरोपी चालकाविरुद्ध गुन्हा दाखल करून कठोर कारवाई करणार असल्याची शक्यता आहे.
या घटनेनंतर पोलिसांनी वाहनचालकांना मद्यपान करून गाडी चालवू नये, वेगावर नियंत्रण ठेवावे आणि वाहतूक नियमांचे काटेकोरपणे पालन करावे, असे आवाहन केले आहे. तसेच, मद्यधुंद अवस्थेत गाडी चालवणाऱ्या चालकांवर कठोर कारवाई केली जाईल, असेही स्पष्ट करण्यात आले आहे.
