२९ जानेवारी २०२५ तांदुळवाडी : “लहान वयात योग्य संस्कार होण्यासाठी कुटुंबात ज्येष्ठ व्यक्तींचे असणे अत्यावश्यक आहे. त्यांचा योग्य मानसन्मान होणे गरजेचे असून वृद्धाश्रम ही संकल्पना कमी होणे आवश्यक आहे. निराधारांना आधार देणाऱ्या ‘कृपा वृद्धाश्रम’ सारख्या संस्थांचे कार्य कौतुकास्पद आहे,’ असे प्रतिपादन भाजपा युवक जिल्हाध्यक्ष अक्षय शिवाजीराव कर्डिले यांनी केले.
राहुरी स्टेशन येथील इंडिया बायबल चर्च फेलोशीप ट्रस्ट अंतर्गत ‘कृपा वृद्धाश्रम’ या संस्थेचा चौथा वर्धापन दिन कार्यक्रम संपन्न झाला. या कार्यक्रमात कर्डिले प्रमुख अतिथी म्हणून बोलत होते. कार्यक्रमाला पोलिस निरीक्षक संजय ठेंगे, संस्थेच्या संचालिका श्रीमती रोहिणी सॅकमन, राहुरी तालुका संजय गांधी निराधार योजना समितीचे अध्यक्ष व पत्रकार विनीत धसाळ, डॉ. जयंत कुलकर्णी, अष्टविनायक इंग्लिश स्कूलचे प्रिन्सिपल मोहनीराज होन,समुदाय आरोग्य अधिकारी डॉ. रेणुका रुपटक्के, ज्येष्ठ पत्रकार वसंतराव झावरे, रिपब्लिकन सेनेचे राजू आढाव, माजी उपसरपंच इंद्रभान पेरणे, रामराव पेरणे, ग्रामपंचायत सदस्या स्वाती धसाळ, अश्विनी चव्हाण आदी
मान्यवर उपस्थित होते.
अक्षय कर्डिले म्हणाले की, “आज ज्येष्ठांनी आपल्या मुलांसाठी प्रचंड हालअपेष्टा सहन केल्या, परंतु त्यांच्या आयुष्याच्या पडत्या काळात त्यांना दुय्यम वागणूक दिली जाते, ही शोकांतिका आहे. अशा परिस्थितीत वृद्धाश्रम ही संकल्पना कमी होणे अत्यावश्यक आहे. मात्र, समाजातील निराधारांना आधार देण्याचे कार्य कृपा वृद्धाश्रम सारख्या संस्था करत असल्याने समाधान वाटते. यासाठी आवश्यक ते सर्व सहकार्य आ. शिवाजीराव कर्डिले यांच्या माध्यमातून केले जाईल.”
पोलिस निरीक्षक संजय ठेंगे यांनी कृपा वृद्धाश्रमाच्या कार्याचे कौतुक करताना म्हटले की, “समाजासाठी अशा प्रकारचे उदारमतवादी कार्य सुरू ठेवणे हे अत्यंत प्रेरणादायी आहे.कोणत्याही पाठबळाशिवाय समाजासाठी असा दृष्टिकोन ठेवणे अभिमानास्पद आहे.”कार्यक्रमात रोहिणी सॅकमन, डॉ. जयंत कुलकर्णी, व्यवस्थापक किरण गायकवाड, डॉ. रेणुका रूपटक्के, इंद्रभान पेरणे, मोहनीराज होन, विनीत धसाळ आदींनी आपले मनोगत व्यक्त केले.
कार्यक्रमात सोसायटी सदस्य अविनाश पेरणे, ग्रामविकास अधिकारी संजय भिंगारदे, तलाठी शरद गिते, संतोष पवार, प्रकाश पंडित, संजय तनपुरे, योगेश लबडे, सलीम शेख, अविनाश दुशिंग, रॉबर्ट सॅकमन, अविनाश सरोदे, सागर गायकवाड, अनिल शिरसाठ, डॉ. राजेश पेरणे, अनिल कासार, प्रमोद खडके यांच्यासह मान्यवर आणि ग्रामस्थ उपस्थित होते. कार्यक्रमात ग्रामपंचायत सदस्या स्वाती घसाळ यांचा जन्मदिवसानिमित्त सन्मान करण्यात आला. व्यवस्थापक किरण गायकवाड यांनी प्रास्ताविक केले, तर जेष्ठ पत्रकार वसंतराव झावरे यांनी आभार मानले.