file photo
अहमदनगर Live24 टीम, 09 फेब्रुवारी 2021:-शहर परिसरात गेल्या काही दिवसांपासून धूमस्टाईल चोर्‍या करणाऱ्या चोरट्यांनी नुसता धुमाकूळ घातला आहे. दिवसाढवळ्या रस्त्याने चाललेल्या महिलांच्या गळ्यातील दागीने हे चोरटे हिसाकावून नेत आहेत.
त्यामुळे महिला वर्गात प्रचंड घबराट पसरली आहे. महिलांना घराबाहेर पडणेही मुश्किल झाले आहे. एकीकडे या घटना वाढत असताना दुसरीकडे पोलिसांकडून मात्र केवळ गुन्हे रजिस्ट्ररला दाखल करण्याचे काम केले जात आहे. या गुन्ह्यांचा तपास लावण्यात पोलिसांना अपयश येत असल्याचे दिसून येत आहे.
दिवसाढवळ्या चोर्‍या, घरफोड्यांचे प्रमाणही वाढले आहे. सोमवारी तर जिल्ह्यात चोर्‍या, घरफोड्यांचा उच्चांक झाला. एकाच दिवसात विविध ठिकाणी चोर्‍या होऊन लाखो रुपयांचा ऐवज चोरीला गेला आहे. त्यामुळे केवळ नगर शहरातील पोलिसच नव्हे तर जिल्हाभरात पोलिस दलासमोर चोरट्यांनी आव्हान निर्माण केले आहे.
सोमवारी दिवसभरात शहर व परिसरात धुमस्टाईल चोरांनी ४ ठिकाणी महिलांच्या गळ्यातील दागीने ओरबाडून नेल्याच्या घटना घडल्या आहेत. यामुळे महिला वर्गात घबराटीचे वातावरण निर्माण झाले आहे.
बालिकाश्रम रोडवरील गायकवाड मळ्यातील शुभांगी कृष्णा गोसावी या देवदर्शनासाठी जात असताना मोटारसायकलवर आलेल्या दोघांनी त्यांच्या गळ्यातील २ तोळे ७ ग्रॅम वजनाचे सोन्याचा गंठण हिसका मारुन तोडून नेले.
दुसरी घटना गुलमोहोर रोडवर घडली. यात प्रतिभा प्रशांत त्रिंबके या मैत्रिणी सोबत जात असताना एका काळ्या रंगाच्या मोटारसायकलवर आलेल्या दोन इसमांनी त्यांच्या गळ्यातील अडीच तोळे वजनाचे सोन्याचे गंठण, दीड तोळे वजनाचे मिनीगंठण, दीड तोळे वजनाचे गंठण असे १ लाख ३७ हजार ५०० रुपये किंमतीचे सोन्याचे दागीने हिसकावून नेले.
तिसरी घटना मार्केटयार्ड चौक परिसरात घडली. श्रद्धा सुशिल भंडारी या त्यांच्या मैत्रिणीसोबत मोपेडवरुन जात असताना मार्केटयार्ड चौकातील सिग्नलला त्या थांबलेल्या होत्या. यावेळी मोटारसायकलवर आलेल्या दोन इसमांनी त्यांच्या गळ्यातील २ तोळे वजनाचे सोन्याचे मिनीगंठण हिसका मारुन पळवून नेले.
या घटनेनंतर अवघ्या १० मिनिटातच आनंदधाम रोडवरील तलरेजा गोडाऊन जवळ राजश्री रामसुख मंत्री या रस्त्याने पायी चाललेल्या असताना मोटारसायकलवर आलेल्या दोन इसमांनी त्यांच्या गळ्यातील २ तोळे वजनाचे सोन्याचे मिनीगंठण तोडून नेले. याप्रकरणी विविध पोलिस ठाण्यात गुन्हे दाखल करण्यात आले आहेत.