Ahmednagar News : सध्या भुरटे चोरटे अनेक नवीन युक्त्या शोधून सर्वसामान्यांची लुबाडणूक करतात. जसे एखाद्याला तुमच्या गाडीचे ऑइल लीक झाले आहे असे सांगितले जाते, नंतर तो व्यक्ती खाली उतरताच त्याला दमबाजी करत त्याच्याकडील रक्कम लांबवली जाते. कधी कधी अंगावर पाणी टाकून देखील लक्ष्य विचलित करून चोरी करतात. अशीच घटना नुकतीच घडली आहे.
मोटारसायकलवर चाललेल्या दोघांना भरदिवसा रस्त्यात अडवून तू माझ्या गाडीला कट का मारला अशी विचारणा करत दमबाजी करून त्याच्या खिशातून २० हजारांची रोकड बळजबरीने काढुन घेतली. ही घटना नगर पाथर्डी रोडवर बाराबाभळी गावाजवळील पुलावर सोमवारी (दि.२४) दुपारी १ च्या सुमारास घडली.
याबाबत भगवान उत्तम खाडे (वय ४६, रा. पेठ पांगरा, ता. आष्टी, जि. बीड) यांनी भिंगार कॅम्प पोलिस ठाण्यात फिर्याद दिली आहे.
याबाबत अधिक माहिती अशी, फिर्यादी खाडे व त्यांचा एक सहकारी असे दोघे त्यांच्या मोटारसायकलवर पाथर्डी कडून नगरकडे येत होते. ते बाराबाभळी गावाजवळ असलेल्या पुलावर आले असता त्यांच्या पाठीमागून आलेल्या एका मोटारसायकलस्वाराने त्यांच्या मोटारसायकलला त्याची मोटारसायकल आडवी लावून त्यांना थांबवले. त्यानंतर तुम्ही मला कट का मारला म्हणत शिवीगाळ व दमबाजी सुरु केली.
त्यानंतर फिर्यादी खाडे यांच्या खिशात हात घालत त्यांच्या खिशातून २० हजारांची रोकड काढुन घेतली व दमबाजी करत तेथून निघून गेला. ही घटना फिर्यादी खाडे यांनी भिंगार पोलिसांना सांगितली. या फिर्यादीवरून पोलिसांनी अनोळखी इसमाविरुद्ध गुन्हा दाखल केला आहे.