Ahmadnagar News : नगर जिल्ह्यातील मुदत संपलेल्या ८४ ग्रामपंचायत सदस्य मंडळ आणि विविध कारणामुळे रिक्त असणार्‍या १५५ सदस्यांच्या जागांसाठी पुढील महिन्यांत निवडणूक होण्याची शक्यता आहे.
यामुळे विधानसभेआधीच ग्रामपंचायत निवडणुकीचा बिगूल वाजणार आहे. राज्य निवडणूक आयोगाने यासाठी तयारी सुरू केली असून मंगळवारी (दि.९) प्रभागनिहाय प्रारूप मतदार यादी प्रसिध्द होणार आहे.
त्यानंतर १९ जुलैला प्रभागनिहाय अंतिम मतदार यादी प्रसिध्द होणार असून त्यानंतर निवडणूक आयोग कधीही याठिकाणी निवडणूक घोषित करणार आहे.
दरम्यान, जानेवारी ते डिसेंबर २०२४ या कालावधीत मुदत संपणार्‍या, नवनिर्मित, मागील निवडणुकीत चुकीची प्रभागरचना झालेल्या, तसेच बहिष्कार व अन्य कारणामुळे निवडणूका न होवू शकलेल्या राज्यातील सुमारे १ हजार ५८८ ग्रामपंचायतींच्या निवडणुकीसाठी, तसेच सदस्य अथवा थेट सरपंच यांच्या रिक्त असणार्‍या जागांसाठी पोटनिवडणूक घेण्यासाठी नुकत्याच झालेल्या लोकसभा निवडणुकीत वापरलेली विधानसभेची मतदारयादी वापरण्याच्या सुचना राज्य निवडणूक आयोगाने काढल्या आहेत.
त्यानूसार नगर जिल्ह्यात ८४ ग्रामपंचायती आणि १५५ ठिकाणी पोटनिवडणुकीसाठी आज प्रभागनिहाय प्रारूप मतदार यादी प्रसिध्द होणार आहे. त्यानंतर १५ जुलैपर्यंत त्यावर हरकती घेण्यास मुदत असून १९ तारखेला प्रभागनिहाय अंतिम मतदार यादी प्रसिध्द करण्यात येणार आहे.
या प्रक्रियेमुळे राज्य निवडणूक आयोगाने ग्रामपंचायत निवडणुकीची तयारी सुरू केली आहे.
मतदार यादी अंतिम झाल्यावर कधीही निवडणुकीची घोषणा होण्याची शक्यता जिल्हा निवडणूक विभागाने व्यक्त केली आहे.
८४ ग्रामपंचायत आणि १५५ सदस्य पदांसाठी आज प्रभागनिहाय प्रारूप मतदार यादी, तर १९ जुलैला अंतिम मतदार यादी प्रसिध्द करण्याचे निवडणूक आयोगाचे आदेश आहेत.
जिल्ह्यातील ८४ ग्रामपंचायतींचा कार्यकाळ पूर्ण झाला आहे. यामध्ये नेवासा तालुयातील २६, कर्जत १७, अकोले ८, नगर ७, संगमनेर २, कोपगाव ३, राहाता १, श्रीरामपूर २, राहुरी ३, शेवगाव ५, पाथर्डी ४, जाखमेड ३, श्रीगोंदा १ आणि पारनेर १ यांचा समावेश आहे.
मुदत संपलेल्या ग्रामपंचायत आणि सदस्य संख्या
अकोले ८ (६९ सदस्य), संगमनेर २ (१४ सदस्य), कोपरगाव ३ (७ सदस्य), राहाता १ (३ सदस्य), श्रीरामपूर २ (७ सदस्य), राहुरी ३ (६ सदस्य), नेवासा २६ (१० सदस्य), शेवगाव ६ (१९ सदस्य), पाथर्डी ४ (६ सदस्य), जामखेड ३ (सदस्य ५) श्रीगोंदा १ (४ सदस्य), कर्जत ८ (३ सदस्य), पारनेर १ (६ सदस्य) आणि नगर ७ (६ सदस्य) एकूण ८४ ग्रामपंचायत आणि १५५ सदस्य यांचा समावेश आहे.