Ahmednagar News : संपदा नागरी सहकारी पतसंस्थेतील गैरव्यवहार प्रकरणी दाखल गुन्ह्याबाबत सर्वात मोठी अपडेट आली आहे. या दाखल प्रकरणातील सर्वच्या सर्व आरोपींना अर्थात २२ आरोपी दोषी ठरवण्यात आले आहेत.
जिल्हा व सत्र न्यायालयाने हा निकाल दिलाय. या आरोपींमध्ये चेअरमन ज्ञानदेव वाफारे, व्हा. चेअरमन यांच्यासह संचालक मंडळाचा समावेश आहे. दरम्यान आता आरोपींच्या शिक्षेवर सोमवारी (दि.८) सुनावणी होणार आहे.
संपदा पतसंस्थेत सुमारे १३ कोटी ३८ लाख रुपयांचा अपहार केल्याप्रकरणी पोलिस ठाण्यात संचालक मंडळ व अधिकाऱ्याविरोधात गुन्हा दाखल करण्यात आला होता. आरोपींमध्ये ज्ञानदेव सबाजी वाफारे, सुजाता ज्ञानदेव वाफारे, सुधाकर परशुराम थोरात, भाउसाहेब कुशाबा झावरे, उत्तमराव दगडू चेमटे, दिनकर बाबाजी ठुबे, विष्णूपंत गणपत व्यवहारे, राजे हसन अमीर, बबन देवराम झावरे, लहू सयाजी घंगाळे,
हरिश्चंद्र सावळेराम लोंढे, रविंद्र विश्वनाथ शिंदे, साहेबराव रामचंद्र उर्फ बाळासाहेब भालेकर, संजय चंपालाल बोरा, अनुप प्रविण पारेख, मारूती खंडू रोहोकले, चिमाजी खंडू रोहोकले, बबन खंडू रोहोकले, सुधाकर गोपीनाथ सुंबे, गोपीनाथ शंकर सुंबे, महेश बबन झावरे व संगिता हरिश्चंद्र लोंढे यांचा समावेश आहे.
या खटल्यात जिल्हा व सत्र न्यायाधीश, अहमदनगर एन. आर. नाईकवाडे यांनी संपदा पतसंस्थेच्या झालेल्या अपहार रक्कम १३ कोटी ३८ लक्ष ५५ हजार ६६७ रुपये प्रकरणी वेगवेगळ्या कलमांखाली दोषी धरलेले आहे. आरोपींना शिक्षा देणेबाबतची सुनावणी ८ एप्रिल २०२४ रोजी न्यायालयात ठेवलेली आहे.
सदर खटल्यामध्ये सरकारी पक्षाच्या वतीने अनिल ढगे हे काम पाहत असून त्यांना अवसायक मंडळाच्यावतीने अॅड. सुरेश लगड व ठेवीदारांच्यावतीने अॅड. अनिता दिघे या सहाय्य करत आहेत. सदर सत्र खटल्यामधील लेखा परिक्षक देवराम मारुतराव बारसकर यांनी वरील आरोपींविरूध्द १ ऑगस्ट २०११ रोजी कोतवाली पोलिस ठाण्यात फिर्याद दिली होती. फिर्यादीमध्ये विनातारण कर्ज कर्जदारांना वाटप करण्यात आलेले होते व ते नियमबाह्य देण्यात आलेले होते.
तसेच सोने तारण कर्ज हेही नियमबाह्य देण्यात आले होते. तसेच तत्कालीन संचालक मंडळाचे नातेवाईक व कर्मचारी यांनाही बेकायदेशीररित्या कर्ज वाटप करण्यात आलेले होते. सदर आरोपींनी सदर रक्कमेचा अपहार करून रक्कम स्वतःचे फायद्याकरिता वापरली होती.
तसेच रकमेबाबत खोटया नोंदी करून सभासदास चुकीची माहिती देवून कायदेशिररित्या आर्थिक संस्था चालविताना ठेवीदाराच्या ठेवीचा विनीयोग बेकायदेशिरपणे अटी व नियम यांचे पालन न करता सभासदांच्या ठेवी परत करण्यास असमर्थता दर्शविली व ठेवीदारांचे रकमेची अफरातफर करून फसवणूक केल्याचे फिर्यादीत म्हटले होते.