Maharashtra News
Maharashtra News : सरकार ४.५ लाख कोटी रुपयांच्या गुंतवणुकीसह एकूण १०,००० किमी नवीन एक्स्प्रेसवे प्रकल्प उभारत आहे, असे केंद्रीय रस्ते वाहतूक आणि महामार्ग मंत्री नितीन गडकरी यांनी सोमवारी सांगितले.
गडकरी पुढे म्हणाले की, भारतमाला परियोजनेअंतर्गत हे रस्ते बांधले जात आहेत. भारतीय राष्ट्रीय महामार्ग प्राधिकरणाने (एनएचएआय) निधीच्या विविध माध्यमातून ७०,००० कोटी रुपये उभे केले आहेत.
ही रक्कम महामार्ग प्रकल्पांसाठी वापरली जाणार आहे. इंडियन इन्स्टिट्यूट ऑफ मॅनेजमेंट- कोझिकोड (आयआयएम कोझिकोड) द्वारे आयोजित ‘पायाभूत सुविधा वित्तपुरवठा व्यवस्थापन विकास कार्यक्रम’ या कार्यक्रमात गडकरी म्हणाले की, सरकारने देशभरातील ६५,००० किमी महामार्गांच्या विकासासाठी भारतमाला प्रकल्पाची कल्पना केली आहे.
पहिल्या टप्प्यातील रस्त्यांचे जाळे ३४,८०० किमी आहे. आम्ही ४.५ लाख कोटी रुपये खर्चून १०,००० किमीचे नवीन एक्स्प्रेसवे बांधत आहोत. देशातील एकूण राष्ट्रीय महामार्गाचे जाळे २०१४ मध्ये ९१,००० किमी होते, ते आता १.४५ लाख किमी झाले आहे.
गडकरी म्हणाले की, सरकार पायाभूत सुविधा पाइपलाइन आणि पंतप्रधान गतिशक्ती राष्ट्रीय मास्टर प्लॅनद्वारे अर्थव्यवस्थेला चालना देत आहे. हे कार्यक्रम देशातील एकात्मिक आणि सर्वांगीण विकास सुनिश्चित करतील.
तसेच या पायाभूत सुविधा प्रकल्पांमुळे दुर्गम भाग जोडले जाणार असल्याने खर्च आणि वेळेची बचत होणार आहे. गडकरी म्हणाले की, पायाभूत सुविधांमध्ये गुंतवणूक करण्यासाठी मालमत्ता बाजारात आणणे महत्त्वाचे आहे.
राष्ट्रीय मुद्रीकरण योजनेत (बाजारात मालमत्ता ऑफर करण्याची योजना) एनएचएआयची २७ टक्के भागीदारी आहे. राष्ट्रीय महामार्गांच्या मुद्रीकरणासाठी आम्ही प्रत्यक्षात अनेक मॉडेल पुढे नेत आहोत. यामध्ये टीओटी ( टोल-ऑपरेट- हस्तांतरण),इनविट (इन्फ्रास्ट्रक्चर इन्व्हेस्टमेंट ट्रस्ट) आणि प्रकल्प आधारित वित्तपुरवठा यांचा समावेश आहे.