Bharat Jodo Yatra : काँग्रेस नेते राहुल गांधी यांची भारत जोडो यात्रा सध्या महाराष्ट्रामध्ये आहे. राहुल गांधी यांच्या सावरकरांच्या वक्तव्यामुळे राज्यातील भाजप नेते चांगलेच आक्रमक झाले आहेत. तसेच आता राहुल गांधी यांना इंदूरमध्ये बॉम्बने उडवण्याची धमकी आली आहे.
भारत जोडो यात्रेचा एक भाग म्हणून राहुल गांधी इंदूरला पोहोचल्यावर त्यांना बॉम्बची धमकी मिळाली आहे. जुनी इंदोर पोलीस ठाण्याच्या हद्दीतील एका मिठाईच्या दुकानात धमकीचे पत्र मिळाले आहे. जुनी इंदूर पोलीस आणि गुन्हे शाखेने पत्र टाकलेल्या व्यक्तीचा शोध सुरू केला आहे.
सूत्रांनी दिलेल्या माहितीनुसार, पोलीस जुनी इंदूर पोलीस स्टेशन परिसरात लावण्यात आलेल्या सीसीटीव्ही फुटेजची बारकाईने तपासणी करत आहेत.
24 नोव्हेंबरच्या सुमारास राहुल गांधी इंदूरच्या खालसा स्टेडियममध्ये रात्र विश्रांती घेतील. पोलीस सूत्रांनी दिलेल्या माहितीनुसार, या घटनेमागे खोडकर घटकाचा हात असू शकतो. पोलिसांनी या संपूर्ण प्रकरणाचा तपास सुरू केला आहे.
20 नोव्हेंबरला यात्रा मध्य प्रदेशात दाखल होणार आहे
राहुल गांधी देशात कन्याकुमारी ते काश्मीर अशी पायी ‘भारत जोडो यात्रा’ काढत आहेत. भारत जोडो यात्रा २० नोव्हेंबरला मध्य प्रदेशात दाखल होणार आहे. या प्रवासात राहुल गांधींसोबत चालण्याची तयारी काँग्रेस नेते करत आहेत.
दुसरीकडे इंदूरच्या सावर विधानसभेच्या काँग्रेस नेत्या रीना बोरासी यांनीही पायी पदयात्रा काढून काँग्रेसच्या भारत जोडो यात्रेची तयारी सुरू केली आहे. काँग्रेस नेते आणि शहराध्यक्ष रवी भदोरिया म्हणाले की, राहुल गांधींच्या भारत जोडो यात्रेबद्दल लोकांमध्ये प्रचंड उत्साह आहे.
भारत जोडो यात्रेशी सर्व वर्गातील लोक थेट जोडले जात आहेत. माळवा भागात ही यात्रा जोरात निघणार आहे. भारत जोडो यात्रेत हजारो तरुण सहभागी होणार आहेत.
त्यांनी सांगितले की, राहुल गांधींच्या सर्वसाधारण सभेत लाखोंच्या संख्येने लोक जमण्याची शक्यता आहे. शहरातील प्रमुख हॉटेल्स बुक करण्यात आली आहेत.