अहमदनगर Live24 टीम, 12 मे 2021 :- टाळेबंदीत उदरनिर्वाहासाठी शहरातील विडी कामगारांना दोन हजार रुपये अनुदान त्वरीत त्यांच्या खात्यावर मिळण्यासाठी लालबावटा विडी कामगार युनियनच्या (आयटक) वतीने जिल्हाधिकारी कार्यालय येथे निवेदन देण्यात आले.
अन्यथा रस्त्यावर उतरून आंदोलन करण्याचा इशारा देण्यात आला. यावेळी सल्लागार अ‍ॅड.कॉ. सुभाष लांडे, जिल्हा सचिव अ‍ॅड.कॉ. सुधीर टोकेकर, उपाध्यक्षा कॉ. भारती न्यालपेल्ली, संगीता कोंडा, शोभा बिमन, शारदा बोगा, सुमित्रा जिंदम आदी उपस्थित होते.
टाळेबंदी काळात एमआयडीसी सुरू असून, तेथील कामगारांना पगार मिळत आहे. सरकारी कर्मचार्‍यांनाही पगार सुरू आहे. रिक्षाचालक, बांधकाम कामगार, मोलमजूर यांना राज्य सरकारने दीड हजार रुपये अनुदान देण्याचे जाहीर केले.
विडी कामगारांना एक महिना झाला असून, त्यांचे हातावर असलेले विडी वळण्याचे काम बंद आहे. विडी कारखान्यांना आगाऊ रक्कम मागणी करुनही देण्यात आलेली नाही. विडी कामगार दारिद्रयरेषेखाली असून गरीब आहेत.
रोजच्या मजूरीवर त्यांच्या कुटुंबाचा उदरनिर्वाह चालत असतो. मात्र टाळेबंदीत सर्व काम बंद असल्याने त्यांच्यावर उपासमारीची वेळ आली असल्याचे निवेदनात म्हंटले आहे. संघटनेच्यावतीने प्रशासनाकडे सातत्याने पत्रव्यवहार करून विडी कामगारांना आर्थिक मदत देण्याची मागणी करण्यात आली आहे.
मात्र या मागणीकडे दुर्लक्ष केले जात असल्याचा आरोप करण्यात आला आहे. विडी कामगारांना उदर्निवाहासाठी आर्थिक मदत देण्यात आलेली नाही. विडी कामगारांना तातडीने दोन हजार रुपयेची मदत मिळण्याची मागणी संघटनेच्या वतीने करण्यात आली आहे.