IMD Alert : देशात बदलत असणाऱ्या हवामानावर पुन्हा एकदा भारतीय हवामान विभागाकडून मोठा इशारा देण्यात आला आहे. हवामान विभागाने नवीन वर्षाच्या पहिल्या आठवड्यासाठी अंदाज व्यक्त करताना 31 डिसेंबरपासून उत्तर-पश्चिम भारतातील बहुतेक भागात लोकांना दाट धुके आणि थंड लाटेचा सामना करावा लागणार असल्याची माहिती दिली आहे.
विभागानुसार 29 डिसेंबर रोजी पंजाबच्या काही भागांमध्ये थंडीची लाट येण्याची शक्यता आहे आणि 1 आणि 2 जानेवारी रोजी पंजाब, हरियाणा, चंदीगड, दिल्ली आणि उत्तर राजस्थानच्या एकाकी भागात थंडीची लाट राहील. या दरम्यान हरियाणा, चंदीगड, दिल्ली, उत्तर प्रदेश आणि उत्तर राजस्थानमध्ये दाट धुके राहील.
गेल्या 24 तासांत राजस्थानमधील चुरू हे सर्वात थंड होते. मंगळवारी रात्री तेथे पारा घसरून 40.6 अंशावर पोहोचला. या काळात पंजाब, हरियाणा, चंदीगड, दिल्ली, राजस्थान, उत्तर प्रदेश आणि लगतच्या उत्तर मध्य प्रदेशातील अनेक भागांमध्ये किमान तापमान 3-7 अंश सेल्सिअसच्या श्रेणीत राहिले.
दरम्यान, राष्ट्रीय राजधानीतील लोकांना बुधवारी थंडीपासून थोडासा दिलासा मिळाला, हा दिलासा काही दिवसांचा असला तरी जानेवारीत पुन्हा थंडीचा प्रकोप वाढण्याची शक्यता आहे. रेल्वेच्या प्रवक्त्याने सांगितले की, दाट धुक्यामुळे दिल्लीकडे जाणाऱ्या 14 गाड्या उशिराने धावत आहेत. सफदरजंग वेधशाळेत बुधवारी 6.3 अंश सेल्सिअस किमान तापमानाची नोंद झाली.
मंगळवारी किमान तापमान 5.6 अंश सेल्सिअस तर सोमवारी पाच अंश सेल्सिअस नोंदवले गेले. धर्मशाला येथे मंगळवारी किमान तापमान 6.2 अंश सेल्सिअस, डेहराडूनमध्ये 7 अंश सेल्सिअस आणि नैनितालमध्ये 7.2 अंश सेल्सिअस होते, तर मंगळवारी दिल्लीचे किमान तापमान 5.6 अंश सेल्सिअस नोंदवले गेले. हवामान शास्त्रज्ञांनी दिवसाच्या तापमानात झालेल्या या घसरणीचे श्रेय मैदानी प्रदेशातून वाहणारे थंड वायव्य वारे आणि धुक्याच्या वातावरणामुळे कमी सूर्यप्रकाश यांना दिले आहे.
‘स्कायमेट वेदर’चे हवामानशास्त्र आणि हवामान बदल विभागाचे उपाध्यक्ष महेश पलावत यांनी सांगितले की, वेस्टर्न डिस्टर्बन्समुळे 25-26 डिसेंबर रोजी पर्वतांवर पुन्हा बर्फवृष्टी झाली, त्यानंतर आता थंड उत्तर-पश्चिम वारे वाहत आहेत. विभागानुसार, किमान तापमान 10 अंश सेल्सिअस किंवा त्यापेक्षा कमी आणि कमाल तापमान किमान 4.5 अंश सेल्सिअस सामान्य तापमानापेक्षा कमी असेल तेव्हा ‘कोल्ड डे’ मानला जातो.
जेव्हा कमाल तापमान 6.5 अंश किंवा त्यापेक्षा जास्त असते तेव्हा तो ‘अत्यंत थंड दिवस’ मानला जातो. पलावत म्हणाले की, ताज्या वेस्टर्न डिस्टर्बन्सच्या प्रभावाखाली वायव्य भारतातील थंडीची लाट बुधवारपासून संपेल. मात्र, हा दिलासा काही दिवसच राहण्याची शक्यता आहे. त्यांनी सांगितले की, वेस्टर्न डिस्टर्बन्सनंतर किमान तापमानात पुन्हा घट होईल. सोमवारी दिल्लीत ‘अत्यंत थंड दिवस’ होता कारण काही ठिकाणी कमाल तापमान सामान्यपेक्षा 10 अंशांनी कमी नोंदवले गेले होते.
सोमवारी सफदरजंग वेधशाळेत कमाल तापमान 15.6 अंश सेल्सिअस होते, जे सामान्यपेक्षा सहा अंशांनी कमी होते. 17 डिसेंबर 2020 नंतर डिसेंबरमध्ये या तारखेला नोंदवलेले हे सर्वात कमी तापमान होते. दुसरीकडे, मंगळवारी कमाल तापमान सरासरीपेक्षा तीन अंशांनी कमी 17.2 अंश सेल्सिअस नोंदवले गेले. बुधवारी 19 अंश सेल्सिअस आणि गुरुवारी 20 अंश सेल्सिअसच्या आसपास राहण्याची शक्यता आहे.
भारतीय हवामानशास्त्र विभागाच्या (IMD) अधिकाऱ्याने सांगितले की, दिल्ली-NCR (राष्ट्रीय राजधानी क्षेत्र) सह संपूर्ण उत्तर भारतात बुधवारी सकाळी कमी धुके होते. “दिल्ली आणि उत्तर प्रदेशमधील सर्व विमानतळांवर फक्त धुके दिसून आले,” असे अधिकाऱ्याने सांगितले. चंदीगडमध्येही हलके धुके दिसून आले. तथापि, पठाणकोट, जम्मू आणि अमृतसरमध्ये आज दाट धुके पसरले आहे.