Pune News : भीमा कोरेगाव येथे होणाऱ्या विजयस्तंभ अभिवादन सोहळा निमित्त पुण्यातील वाहतूक व्यवस्थेत मोठा बदल करण्यात आला आहे. या सोहळ्याच्या पार्श्वभूमीवर अवजड वाहनांना शहरात येण्यास बंदी करण्यात आली आहे.दरवर्षी भीमा कोरेगाव येथे विजयस्तंभ अभिवादन सोहळा आयोजित होतो. सालाबादाप्रमाणे एक जानेवारी 2025 ला भीमा कोरेगाव येथे विजयस्तंभ अभिवादन सोहळा आयोजित होणार आहे.
या सोहळ्यासाठी देशभरातील आंबेडकरी अनुयायी भीमा कोरेगाव येथे हजेरी लावत असतात. एक जानेवारीला देखील भीमा कोरेगाव येथे आंबेडकर अनुयायांची मोठ्या प्रमाणात गर्दी होणार आहे.दरम्यान याच गर्दीच्या पार्श्वभूमीवर प्रशासनाने एक मोठा निर्णय घेतलेला आहे. प्रशासनाने उद्या 31 डिसेंबर 2024 रोजी दुपारी दोन वाजेपासून काही रस्त्यांवरील वाहतुकीत बदल केलेला आहे.
वाहतूक शाखाकडून याबाबतचे परिपत्रक निर्गमित करण्यात आले असून आता आपण विजयस्तंभ अभिवादन सोहळा निमित्ताने वाहतुकीत नेमका कोणता बदल केला जाणार आहे, कोणते रस्ते बंद राहणार आहेत आणि पर्यायी वाहतुकीचा पर्याय काय असेल या संदर्भात अगदी सविस्तर माहिती जाणून घेण्याचा प्रयत्न करणार आहोत.
कसे असतील वाहतुकीतील बदल ?
पुणे नगर रस्त्यावरून पुण्याकडून नगरकडे जाणाऱ्या वाहनांनी खराडी बाह्यवळण मार्गावरुन वळून मुंढवा, मगरपट्टा चौक, पुणे-सोलापूर रस्ता, केडगाव चौफुला, न्हावरा, शिरुरमार्गे नगर रस्त्याकडे जावे.कोल्हापूर, सांगली, सातारा, कात्रजमार्गे मंतरवाडी फाटा, मगरपट्टा चौक येथून नगरकडे जाणाऱ्या वाहनांना हडपसर येथून केडगाव चौफुलामार्गे शिरुकडे जावे लागणार आहे.
सोलापूर रस्त्याने आळंदी, चाकणकडे जाणाऱ्या वाहनांनी हडपसर, नगरपट्टा चौक, खराडी बाह्यवळण मार्गावरुन विश्रांतवाडीकडे जाऊन तेथून आळंदी आणि चाकणकडे जावे अशी माहिती प्रशासनाने दिली आहे.इंद्रायणी नदीवरील आळंदी-तुळापूर पूल जड वाहतुकीस बंद करण्यात आला आहे, या पुलावरुन केवळ अनुनायांच्या हलक्या वाहनांना प्रवेश देण्यात येणार आहे.
विश्रांतवाडी, लोहगावमार्गे वाघोलीकडे जाणारी जडवाहतूक बंद ठेवण्यात येणार आहे.मुंबईकडून नगरकडे जाणाऱ्या वाहनांनी वडगाव मावळ, चाकण, खेड, मंचर, नारायणगाव, आळेफाटामार्गे नगरकडे जावे.मुंबईहून नगरकडे जाणाऱ्या हलक्या वाहनांनी वडगाव मावळ, चाकण, खेड, पाबळ, शिरुरमार्गे नगरकडे जावे.तसेच लोणी काळभोर परिसरातील थेऊर फाटा, कात्रज चौक, कोंढव्यातील खडी मशीन चौक, फुरसुंगीत मंतरवाडी फाटा, खडकीतील हॅरीस पूल, विश्रांतवाडीतील बोपखेल फाटा, बाणेरमधीमल राधा चौक, सिंहगड रस्ता भागातील नवले पूल, मरकळ पुल येथून शहरात येणाऱ्या सर्व प्रकारच्या अवजड वाहनांना बंदी घालण्यात आली असल्याची माहिती वाहतूक शाखेच्या माध्यमातून यावेळी देण्यात आली आहे.