2023 Auto Expo : जगातील सर्वात मोठा वाहन मेळावा भारतात सुरु आहे. या मेळाव्यामध्ये अनेक कार कंपन्यांनी आपल्या नवीन कारचे मॉडेल सादर केले आहे. हा मेळावा टाटा कंपनीने गाजवल्याचे दिसत आहे. कारण कंपनीने यावेळी १२ धमाकेदार कार सादर केल्या आहेत.
ग्रेटर नोएडामध्ये इंडिया ऑटो एक्सपो भरवण्यात आला आहे. या वाहन मेळाव्यात अनेक कंपन्यांनी सहभाग नोंदवला आहे. मोठ्या उत्साहात हा इंडिया ऑटो एक्सपो सुरु आहे. यासाठी जोरदार तयारी करण्यात आली आहे.
टाटा कंपनीकडून अनेक कार सादर करण्यात आल्या आहेत. यामध्ये टाटा पॅसेंजर इलेक्ट्रिक मोबिलिटी लिमिटेडचे व्यवस्थापकीय संचालक शैलेश चंद्र कार्क्रमाच्या स्टेजवर येतात आणि कंपनीच्या पुढील योजनांबद्दल सांगतात.
यावेळी सर्वांचे लक्ष समोर लागलेल्या स्क्रिनवर होते. त्यातच अचानक लाईट लागते आणि पडदा वर घेतला जातो. यावेळी सर्वजण टाळ्यांच्या गजरात टाटाच्या लाल रंगाच्या Curvv कारचे स्वागत करतात.
चारही बाजूनी कॅमेऱ्यांचे फ्लॅश चमकतात आणि लोक कारच्या बाजूने गर्दी करतात. ही तर फक्त सुरुवात होती. अजून बरंच काही बाकी होते. शैलेश चंद्र गाड्यांचा लॉन्च इव्हेंट पुढे घेऊन जातात आणि एक एक करून सर्व वाहनांवरून पडदा उठू लागतो.
या ऑटो एक्स्पोमध्ये, टाटा मोटर्सने त्यांचे कॉन्सेप्ट व्हेईकल अविन्यापासून हॅरियर EV पर्यंत आणि पंच सीएनजी आणि अल्ट्रोज सीएनजीसह सीएनजी सेगमेंटमध्ये अनेक मॉडेल सादर केले आहेत.
ऑटो एक्स्पो 2023 टाटाच्या या गाड्यांनी गाजवला
टाटा कंपनीने वाहन मेळाव्यामध्ये एकूण 12 वाहने आणि संकल्पना सादर केल्या आहेत, ज्यामध्ये शोस्टॉपर्स: SIERRA इलेक्ट्रिक आणि Avinya सारख्या संकल्पनांनी सर्वांचेच लक्ष वेधून घेतले.
तसेच, देशातील पहिली ऑल-व्हील ड्राईव्ह इलेक्ट्रिक SUV, Harrier EV ने तिच्या बोल्ड, शक्तिशाली आणि बुद्धिमान लुक्सने प्रशंसा मिळवली. ही SUV Gen 2 आर्किटेक्चरवर बनवण्यात आली आहे.
Tata Avinya ही तिसर्‍या पिढीच्या आर्किटेक्चरवर तयार केलेली शुद्ध इलेक्ट्रिक वाहन संकल्पना आहे. ज्याला कंपनीने फ्युचरिस्टिक डिझाइन दिले आहे. बसण्यासाठी पुरेशी जागा उपलब्ध होईल आणि प्रवाशांना चांगल्या सुविधा मिळतील, असा कंपनीचा दावा आहे.
टाटा कर्व कूप
Curvv संकल्पनेची ICE आवृत्ती आहे, जी कंपनी नियमित पेट्रोल इंजिनसह ऑफर करेल. याला एसयूव्हीच्या मजबूत बॉडीसह कूप स्टाइल स्लोपी डिझाइन देण्यात आले आहे. ही कार देखील मागील वर्षी सादर करण्यात आली होती, कंपनीचे म्हणणे आहे की ती येत्या 2024 पर्यंत बाजारात विक्रीसाठी सादर केली जाऊ शकते.
कंपनीने Curvv ला आधुनिक SUV ची शार्प लाईन्स आणि कूप सारखी शैली दिली आहे. यामध्ये कंपनीचा पारंपरिक स्प्लिट हेडलॅम्प दिसत आहे. कारच्या आत तीन-स्तरीय डॅशबोर्ड देण्यात आला आहे, ज्यामध्ये अनेक ठिकाणी लाल रंग दिसत आहेत.
ही संकल्पना आवृत्ती असल्याने, उत्पादन तयार मॉडेल वेगळे असण्याची शक्यता आहे. तथापि, कारच्या आतील लाल अॅक्सेंटने कारला स्पोर्टी लुक देण्यासाठी कोणतीही कसर सोडली नाही.
टाटा कंपनीची सीएनजी विभागात जोरदार एन्ट्री
आत्तापर्यंत, मारुती सुझुकी आणि ह्युंदाईने देशातील सीएनजी वाहन पोर्टफोलिओवर अधिक वर्चस्व राखले आहे. पण टाटा मोटर्सने गेल्या वर्षी टियागो आणि टिगोरच्या सीएनजी आवृत्त्या सादर करून या सेगमेंटमध्ये आपले अस्तित्व निर्माण केले आहे. आज ऑटो एक्सपोमध्ये, कंपनीने या सेगमेंटमध्ये आपली पकड आणखी सुधारण्यासाठी पंच CNG आणि Altroz CNG देखील सादर केले आहेत.
दुहेरी सिलेंडर तंत्रज्ञान
या दोन्ही कारची खास गोष्ट म्हणजे सीएनजी कार असूनही तुम्हाला बूट-स्पेस (डिग्गी) मध्ये तडजोड करावी लागणार नाही. यामध्ये सीएनजी सिलेंडर बूटच्या तळाशी बसवण्यात आला असून वरून एक मजबूत ट्रे देण्यात आला आहे, जो त्याचे बूट वर आणि खाली असे दोन भाग करतो.
टाटा मोटर्सचा दावा आहे की ड्युअल सिलेंडर तंत्रज्ञानासह येणारी ही देशातील पहिली सीएनजी वाहने आहेत. म्हणजेच एका कारमध्ये दोन सिलिंडर देण्यात आले आहेत.
टाटा अल्ट्रोझ रेसिंग
याशिवाय कंपनीने परफॉर्मन्स कार प्रेमींसाठी आपल्या प्रीमियम हॅचबॅक कार Altroz ची नवीन Altroz Racer Racing आवृत्ती देखील सादर केली आहे. लाल आणि काळ्या ड्युअल टोन पेंट स्कीमसह येणारी, कार खूपच आकर्षक दिसते.
कंपनीने Tiago.ev ची स्पोर्ट्स आवृत्ती देखील सादर केली आहे. कंपनीचा दावा आहे की रस्त्यावरून चालताना या वाहनाचा लूक खूपच आकर्षक आहे आणि त्याचे ड्रायव्हिंग खूप मजेदार आहे.
टाटा हॅरियर इलेक्ट्रिक एसयूव्ही
टाटा मोटर्स त्याच्या इलेक्ट्रिक वाहन पोर्टफोलिओवर खूप केंद्रित असल्याचे दिसते. कंपनीने या मोटर शोमध्ये आपल्या विद्यमान SUV Harrier चे नवीन इलेक्ट्रिक व्हर्जन सादर केले आहे.
त्याची बॅटरी क्षमता सुमारे 60 kWh असेल आणि असा दावा केला जात आहे की ही SUV सुमारे 400 ते 450 किमीची ड्रायव्हिंग रेंज देईल. कंपनीचे विद्यमान Ziptron तंत्रज्ञान या SUV मध्ये देखील दिसेल, जे Nexon मध्ये देखील वापरले जाते.